Бэтэрээннэр даачаларын өрөмүөннүүллэр

Ааптар: 
Бөлөххө киир:

Кыстыккын сайын дьаһан диэн мээнэҕэ эппэттэр. Дьэ бу этии, Дьокуускайдааҕы Намсыыр даачатын олохтоохторугар оруобуна сөп түбэһэр.

От ыйын өҥүрүк куйаас күннэригэр Намсыыр даачатын бэтэрээннэрэ уу ситимин турбатын уларытарга былаанныллар. Бу даача 70-с сылларга СГУ үлэһиттэригэр бэриллиэҕиттэн, күн бүгүнүгэр диэри бэтэрээннэр тахсан сайылыыллар, оҕуруот аһын эгэлгэтин олордоллор, бэйэлэрин күүстэринэн араас тэрээһиннэри тэрийэллэр. Быйыл, бэс ыйын 21 күнүгэр, бэтэрээн Людмила Егоровна Саввинова уонна Саха араадьыйатын режиссера Екатерина Голикова тэрийиилэринэн алгысчыты ыҥыран ыһыах ыһан, күнү көрсөн, үрүҥ түүн кэрэ ыраас салгыныттан олус дуоһуйбуттара, оһуокайдаан астыммыттара.

Аны, сайын үтүө кэмнэрин баттаһа уу ситимин турбатын үһүс линияҕа олорор 16 ыал уларыттарда. Уруккулара эргэрэн, ардыгар тэстэн, былаастык турбаҕа уларытарга Людмила Ивановна Федорова уонна Светлана Даниловна Атласова хайдах өрөмүөннэтэргэ, хантан атыылаһарга, кыттыгас харчыларын хомуйарга санааларын тобулан, ыалларыгар этии киллэрбиттэрэ. Бүлүүгэ сынньана сылдьар, эмиэ Намсыыр даачатыгар олорор университет аспираннарын кытары үлэлэһэр дьүөгэлэрин Розалия Романовнаҕа Бүлүүгэ төлөппүөнээн, биригээдэ буларыгар көрдөспүттэрэ. Розалия Романовна Бүлүүттэн тутатына кэлэ охсон, үлэлиир университетын хаһаайыстыбаннай сулууспатын кытары кэпсэтэн, үлэһиттэри булан, үһүс линияҕа олорооччуларга кэлэн, уһаайбаларыгар турба ханан барыахтааҕын көрөн, мээрэйдээн, маҕаһыынтан турбалары атыылаһан, сып-сап бүтэрэн, ууну от ыйын 31 күнүгэр ыыттылар.

85 саастаах бэтэрээн Людмила Егоровна уһаайбатыгар саҥа былаастык турбанан уу кэлэрин ыалларынан ыҥырсан, үөрүүлэрин үллэһиннилэр. Людмила Егоровна балаҕаныгар көмүлүөккэ аал оту оттон, уот иччитин арыылаах алаадьынан айах туттулар. Салгыы даача иккис, бастакы линиятыгар олорооччулар эмиэ харчы хомуйан, кыттыһан, үтүө дьыаланы салгыылларыгар баҕардылар. Балаҕаҥҥа көмүлүөк уотугар арчыланан, итии үүттээх чэйи иһэ олорон сахалыы таабырыннастылар, өс хоһоону төһө билэллэрин тургутустулар. Манна өр сылларга университекка история, филология факультетыгар (ИФФ) докумуон, дьыала бэрийээччинэн үлэлээбит, устудьуон аймаҕы кэрэ сэбэрэтинэн, үтүө майгытынан абылаабыт, ытыктабыллаах бэтэрээн Светлана Даниловна уот харахха чуолкайдык таайан, «Айар» кинигэ кыһатын кинигэтинэн бириэмийэлэннэ. Дьэ ити курдук бэтэрээннэр барахсаттар бэйэлэрин күүстэринэн өрөмүөннэрин саҕалаатылар.

Марта Николаева, «Саха сирэ» хаһыат, edersaas.ru саайтыгар анаан.

+1
0
+1
0
+1
0
+1
0
+1
0
+1
0
+1
0