Бэҕэһээ, В.П.Керемясов аатынан Дьокуускай куорат 3 №-дээх спортивнай оскуолатын тустууга саалатыгар, көҥүл тустууга ССРС спордун маастара, Саха АССР үтүөлээх тренерэ Николай Кириллович Алексеев бирииһигэр аҕам саастаах бөҕөстөр өрөспүүбүлүкэҕэ биирдиилээн бастыыр иһин күрэхтэһиилэрэ икки көбүөрүнэн ыытыллан түмүктэннэ.
Петр ПАВЛОВ, “Саха сирэ”, edersaas.ru
Биллэрин курдук, Саха сиригэр көҥүл тустууга кыратыттан кырдьаҕаһыгар диэри күрэхтэһэллэр. Ол туоһутунан, ааспыт нэдиэлэҕэ олимпийскай чөмпүйүөн Павел Пинигин аатынан “Саха сирин тимир суоллара” тэрилтэ бирииһигэр ыытыллыбыт 12-13 саастаах эдэр тустууктар күрэхтэһиилэрин дуораана ситэ сүтэ илигинэ, аны көбүөргэ бэтэрээннэрбит таҕыстылар. Саастарынан араарыллыбыт биэс бөлөххө барыта 71 бөҕөс күрэхтэстэ. Санатан эттэххэ, «А» бөлөххө 35-40 саастаахтар күрэс былдьастылар, ити курдук “В” (41-45), «С” (46-50), “Д» (51-56), “Е» (56-60). Маннык күрэхтэһии Россияҕа атын сиргэ ыытыллара биллибэт. Онон биһиги киэн туттуох кэриҥнээхпит.
Быйылгы күрэхтэһиини эдэр сэнэх саастарыгар үрдүк көрдөрүүнү ситиспит ааттаах-суоллаах бөҕөстөр киэргэттилэр. Ол курдук, аан дойду чөмпүйүөнэ Герман Контоев, ССРС чөмпүйэнээтин боруонса призера Артур Константинов, Россия чөмпүйэнээтин хас даҕаны төгүллээх призердара Владимир Торговкин, Василий Стручков, ССРС эдэрдэргэ түһүлгэтин призера Петр Бурцев, норуоттар икки ардыларынааҕы кылаастаах спорт маастара Александр Птицын, бэтэрээннэргэ аан дойду чөмпүйүөннэрэ Ефрем Ефремов, Федот Соловьев уо.д.а. киэргэттилэр.
Бу ааттаммыт бөҕөстөртөн Петр Бурцев уонна Ефрем Ефремов биир бөлөххө түбэстилэр. Манна даҕатан эттэххэ, быйылгыттан бэтэрээннэр тустууларыгар 60-тан үөһэ саастаахтар бөлөхтөрө суох буолбутунан, сорохтор эдэрдэри кытта тустарга күһэлиннилэр. Холобур, Петр Бурцев Ефрем Ефремовы очукуонан кыайан баран, бүтэһик быһаарыылаах хапсыһыыга Герасим Дьяконовка соһуччу ыраастык хотторон кэбиһэн, чөмпүйүөннүүр балаһыанньатын мүччү тутта. Бу ыйааһыҥҥа бөҕөстөр хардары-таары кыайсыбыттарын түмүгэр, хаачыстыбанан ааҕыыга кыайыылааҕынан Герасим Дьяконов ааттанна.
Чөмпүйүөннэргэ уонна призердарга мэтээллэр, дипломнар, СӨ тустууга федерациятыттан туһааннааҕынан 2, 1,5 уонна 1 тыһ. солк. харчынан бириистэр уонна кыайыылаахтарга Иван Барашков «Первый борцовский» диэн саҥа тахсыбыт сурунааллара туттарылыннылар.
Чөмпүйэнээт чэрчитинэн көҥүл тустууга ССРС, хапсаҕайга Саха АССР спордун маастара, Үлэ Кыһыл Знамята, Бочуот бэлиэтэ уонна Баартыйаҕа килбиэнин иһин уордьаннар кавалердара Максим Николаевич Сибиряков бирииһигэр хапсаҕайга турнир тэрилиннэ. Онно эмиэ көҥүл тустууга кыттыбыттар күрэхтэһэн, үксүлэрэ иккилии мэтээллээх дьиэлээтилэр.
Аны бөҕөстөрбүт Россия уонна аан дойду күрэхтэһиитигэр кыттарга бэлэмнэнэллэр. Манна сыһыары тутан эттэххэ, соторутааҕыта Уус Алдантан Юрий Васильев Калининград куоракка ыытыллыбыт бэтэрээннэр норуоттар икки ардыларынааҕы турнирдарыгар тэҥнээҕин булбакка, бастакы миэстэни ылбытын санатабын. Онон оҕолорбутун, уолаттарбытын, эр дьоммутун тэҥэ, аҕам саастаах тустууктарбыт биир дойдулаахтарын үөрдэ сылдьаллар.
Көҥүл тустууга күрэхтэһии түмүк көрдөрүүтэ:
«А» дивизион
70 кг: 1. Александр Птицын (М-Хаҥалас), 2. Евгений Дьячковскай (Нам), 3. Денис Яковлев (Бүлүү).
78 кг: 1. Прокопий Сергеев (Амма), 2. Андрей Скрябин (Хаҥалас).
130 кг: 1. Алексей Николаев (Дьокуускай), 2. Андрей Протопопов (Уус Алдан).
«В» дивизион
62 кг: 1. Виталий Жирков (Дьокуускай), 2. Дмитрий Монастырев (Чурапчы), 3. Кирилл Афанасьев (Дьокуускай).
70 кг: 1. Василий Уйгуров (Дьокуускай), 2. Анатолий Петров (Алдан), 3. Егор Варламов (Чурапчы).
78 кг: 1. Александр Андреев (Чурапчы), 2. Игорь Оконешников (М-Хаҥалас).
88 кг: 1. Станислав Афанасьев (Дьокуускай), 2. Николай Осипов (Чурапчы).
100 кг: 1. Алексей Некрасов (Дьокуускай).
«С» дивизион
62 кг: 1. Захар Дьячковскай (Дьокуускай), 2. Семен Попов (Чурапчы), 3. Иван Брызгалов (М-Хаҥалас).
70 кг: 1. Герман Контоев (М-Хаҥалас), 2. Спиридон Оконешников, 3. Михаил Сивцев (иккиэн – Чурапчы), Виктор Сивцев (Уус Алдан).
78 кг: 1. Михаил Тихонов (М-Хаҥалас), 2. Егор Винокуров (Булуҥ), 3. Петр Осипов (Таатта), Анатолий Эверстов (Чурапчы).
88 кг: 1. Григорий Массаев (Дьокуускай).
100 кг: 1. Лев Афанасьев (Дьокуускай), 2. Константин Поисеев (Чурапчы), 3. Николай Егоров (М-Хаҥалас).
«Д» дивизион
62 кг: 1. Владимир Торговкин (ХИФУ), 2. Василий Шепелев (Уус Алдан), 3. Иван Тимофеев (Амма).
70 кг: 1. Вадим Данилов (Уус Алдан), 2. Иннокентий Данилов (Дьокуускай), 3. Георгий Соловьев, Николай Сидоров (иккиэн М-Хаҥаластан).
78 кг: 1. Василий Стручков (Дьокуускай), 2. Петр Стручков (Эбээн-Бытантай), 3. Григорий Аргунов (Амма). 88 кг: 1. Николай Баттахов (Амма), 2. Дмитрий Обулахов (Үөһээ Бүлүү), 3. Валерий Попов (Сунтаар).
100 кг: 1. Егор Картузов (Дьокуускай).
«Е» дивизион
62 кг: 1. Федот Соловьев (Дьокуускай), 2. Юрий Тимофеев (Сунтаар), 3. Дмитрий Чаҕаан (Чурапчы), Иннокентий Сивцев (Дьокуускай).
70 кг: 1. Герасим Дьяконов (Дьокуускай), 2. Ефрем Ефремов (Амма), 3. Петр Бурцев (Дьокуускай).
78 кг: 1. Артур Константинов (Дьокуускай), 2. Василий Обулахов (Үөһээ Бүлүү), 3. Алексей Марков (Нам).
88 кг: 1. Николай Мандров (Үөһээ Дьааҥы), 2. Яков Сокольников (Дьокуускай), 3. Иосиф Петров (Амма).
Петр ПАВЛОВ, “Саха сирэ”, edersaas.ru
Ааптар хаартыскаҕа түһэриилэрэ.