Алтынньы 4 күнүгэр «Сахамедиа» холдинг генеральнай дириэктэрэ Алексей Чертков «Аҕам саастаах дьон декадаларын» чэрчитинэн бэтэрээн суруналыыстары кытта көрүстэ. Көрсүһүүгэ Алексей Сергеевич «Сахамедиа» уонна аныгы суруналыыстыка туһунан кэпсээтини тарта. Бэтэрээн суруналыыстар урукку уонна билиҥҥи суруналыыстыканы тэҥнээн көрдүлэр, эдэр суруналыыстарга баҕа санааларын тиэртилэр.
«Эдэртэн — эйэтин, кырдьаҕастан — сүбэтин» диэн муударай этии үйэ саас тухары дьону-сэргэни сөптөөх суолга ыйан кэллэ. Ханнык баҕарар эйгэҕэ, көлүөнэ уларыйыытыгар, уопуттаах бэтэрээннэр эдэр дьоҥҥо сүбэһит-амаһыт буолаллар. Суруналыыстыка курдук киэҥ хабааннаах идэни баһылыырга Иван Борисов, Георгий Васильев, Татьяна Элляева, Светлана Бессонова, Никита Прохоров, Николай Никитин курдук аксакаал суруналыыстар этиилэриттэн болҕойон истиэххэ наада. Интернет сайдыбыт кэмигэр, саайтары, социальнай ситимнэри бэтэрээн суруналыыстар атыҥырыы көрөллөрө чахчы. Ыалдьыттаабыт бэтэрээн суруналыыстар бэйэлэрин санааларын үллэһиннилэр.
Татьяна Элляева, бэтэрээн суруналыыс:
— Урут интернет суох кэмигэр биһиги матырыйаалбытын командировкаларынан сылдьан, көрөн-истэн, үөрэтэн оҥорорбут. Хомойуох иһин, билиҥҥи суруналыыстыкаҕа командировка аччаабыт. Суруналыыстар информацияларын интернеттэн хомуйар буолбуттар. Эдэр суруналыыстарга үлэҕитигэр бэриниилээх, кыһамньылаах, матырыйаалларгытын дириҥник үөрэтэн суруйар буолуҥ диэм этэ. Хайаан даҕаны кырдьыгы сымыйаттан араара үөрэниҥ.
Николай Никитин, «Эдэр саас» хаһыат урукку эрэдээктэрэ:
— Суруналыыстыкаҕа билигин зарисовка, фельетон, очерк курдук жанрдары туттубат буоллулар. Интернет сайдыытыгар хаһыат симэлийэн хаалбат. Тирээһэ аччыан сөп. Хаһыаттарга тылы сахатытыынан үлүһүйдүлэр. Тыллары аһары сахатытан ааҕааччылары тэйитэн кэбиһэбит. Маны тэҥэ, интернет сайдыытыгар саҥа сүүрээннэр олоххо киирэллэр. Холорбура, edersaas.ru уонна ulus.media курдук саайтар арылланнар, дьон болҕомтотун тартылар. Сатаммыт бырайыактар дии саныыбын.
Николай Прохоров, бэтэрээн суруналыыс:
— Билигин суруналыыстыкаҕа кириитикэ сүтэн хаалла. Сытыы матырыйааллар дьону хамсаталлар, бэрээдэги олохтууллар.
Төһө даҕаны олох уларыйдын, интернет сайдан истин, олоҕу билбит киһи этиитэ болҕомтоҕо ылыллыахтаах.
Николай Попов, «Саха сирэ» хаһыат, edersaas.ru