Саха сиригэр пассажирдары тиэйэр бастакы историческай буойаска БАМ-ы уонна АЯМ-ы тутуспут бэтэрээннэр бочуоттаах ыалдьыт буолан, далбардык маанылатан кэллилэр.
edersaas.ru
Кинилэр истэригэр Социалистическай Үлэ Дьоруойа Иван Варшавскай «легендарнай» диэнинэн биллэр. Уопсайа БАМ-ы уонна АЯМ-ы тутуспут дьонтон сэттэ киһи Сэбиэскэй Сойуус бу үрдүк аатын ылар чиэскэ тиксибит.
Мин Иван Николаевиһы кытта билсиэм иннинэ, Алдаҥҥа бастакы пассажирскай буойаһы атаарыы сиэрин-туомун кэмигэр кытыыга биир аҕамсыйыт баттахтаах киһи тугу эрэ толкуйдуурдуу, ырааҕы одуулаһа турарын бэлиэтии көрбүтүм.
«Чахчы, БАМ уонна АЯМ бэтэрээнэ быһылаах», — диэн киниэхэ чугаһаан, бэйэтин билиһиннэрэригэр көрдөспүтүм.
1974 cылтан тимир суол тутуутугар сылдьыбыт ытык киһи: «Дьон-сэргэ аны ыраах айан суолунан айаннаан эрэйдэммэккэ, кинигэ, хаһыат ааҕа-ааҕа, утуйан, сынньанан ыла-ыла, бэрт холкутук айанныыр кыахтанна. Билигин аны Магаадаҥҥа диэри тимир суолу тутар сорук тутар. Онон аныгы ыччат биһиги курдук сайдыы олугун салгыырга ылсыаҕа. Мин Аччыгый БАМ-тан саҕалаан, Тында-Беркакит-Нерюнгри туһаайыынан барар тимир суолу тутуспутум. Бастакы буойаһы атаарыыга Алданнааҕы тимир суол вокзалыгар бэрт элбэх ыччат үлэлиирин сөҕө уонна астынна көрдүм. Биһиги туппут суолбутунан бүгүн пассажирдары тиэйэр буойас үлэтин саҕалаата. Онон аны Сахабыт сирин хоту өттүгэр тимир суол тутуутугар ыччаппыт ылсыаҕа диэн эрэлбит муҥура суох, — диэн санаатын тиэртэ.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.