Бэтэрээн тустууктар уочараттаах, алтыс төгүлүн буолар аһаҕас чөмпүйэнээттэрэ бу дьыл муус устар ый 7-8 күннэригэр Дьокуускай куоракка В.П.Керемясов аатынан 3 №-дээх оҕо спордун оскуолатыгар ыытыллара быһаарылынна. Бу чөмпүйэнээппит үһүс төгүлүн математик бөҕөс, ХИФУ профессора, Саха сирин көҥүл тустууга үтүөлээх тренерэ, быйыл ахсынньы ыйга 80 сааһын томточчу туолуохтаах Николай Кириллович Алексеев аатыгар ананыаҕа. Ону сэргэ, көҥүл тустууга ССРС уонна хапсаҕайга Саха АССР спордун маастара, үс уордьан: Үлэ Кыһыл Знамята, Бочуот бэлиэтэ, «Партийнай килбиэн» кавалера, 84 сааһыгар сылдьар Максим Николаевич Сибиряков аатынан хапсаҕайдаһан тустууга турнир ыытыллар буолла.
Бу дьыл олунньу 28 күнүгэр тустуу Саха сиринээҕи федерациятын бэрэсидьиэнинэн биир санаанан быыбардаммыт Семен Березин бэтэрээн бөҕөстөрү кытары көрсүһүү тэрийбититтэн, кинилэр санааларын истэн, истиҥ кэпсэтии ыыппытыттан тирэх ылан уонна бэтэрээннэр сэбиэттэрин бырабылыанньатын түмсүү сүбэ мунньаҕын ыытан, бары өттүттэн ырытан баран, итинник түмүккэ кэллибит. Санатан эттэххэ, С.М.Березинныын көрсүһүүгэ уопсайа 20-тэн тахса киһи сырытта. Бары да тустуу сайдыытыгар кылааттарын киллэрсибит, бэйэлэрин кэмнэригэр улаханнык аатырбыт, сорохторо өрөспүүбүлүкэ түһүлгэтигэр хотторуу хомолтотун билбэтэх дьон, билигин сааһыра быһыытыйан сылдьар да буоллаллар, өйдөрө-санаалара тобуллаҕас, саҥалара-иҥэлэрэ чуолкай, дириҥ өйдөбүллээх, кыайыылаах өттө үгүс. «Дьэ бу буолар, биһиги, бэтэрээннэр, улуу күүспүт» дии саныыбын кинилэри истэ олорон. Холобурун, бүгүн бочуоттаах сынньалаҥҥа олорор ытыктабыллаах «банаардаах сырдыктаах учуутал убайбытын» Николай Николаевич Волковы, кини өрөспүүбүлүкэҕэ хапсаҕайга да, көҥүл тустууга даҕаны иккиэннэригэр бастаан баран, биирдэ да хотторбокко туораабыта. Арай, кэлин цииркэ атлета Иван Морозовка көрдөрүүлээх хапсыһыыга баһыйтаран, эчэйии ылан, спордунан дьарыктанарын тохтоппут. Ити Иван Морозов биһиги көҥүл тустуубут сайдыытыгар биир кэмҥэ улахан оруолу ыла сылдьыбыт өҥөлөөх киһибит буолар. Саха спордун маҥнайгы миниистирэ, көбүөр улахан маастара, Россия чөмпүйүөнэ, ССРС кубогын хамаанданан күрэхтэһиитин кыайыылааҕа Петр Егорович Попов, өрөспүүбүлүкэ спорка кэмитиэтин уонтан тахса сыл салайан олорбут Афанасий Егорович Алексеев, РСФСР 1964 с. түһүлгэтин үрүҥ көмүс призёра, билигин биллэр тойуксут, оһуохай тылын этээччи, олоҥхоһут, олоҕун устатыгар чөл туругу тута сылдьар бөлүһүөк аҥардаах Владимир Дмитриевич Данилов уонна ити үөһээ ахтан аһарбыт ХИФУ профессора, билигин да үлэ үөһүгэр сылдьар Николай Кириллович Алексеев – бу биһиги киэн туттар бэтэрээннэрбит ити көрсүһүүгэ бэйэлэрин бүччүм санааларын эппиттэрэ, сорохтор этиилэрин салҕаан, федерация бырабылыанньатын бастакы сүбэ түмсүүтүгэр санааларын суругунан түһэрбиттэрин, С.М.Березиҥҥэ тус илиитигэр туттаран турабын.
Мин спорка син балачча эриллэн кэллим. Ол тухары, Дьокуускайга «Спартак» стадиоҥҥа 1985 сыллаахха ССРС көҥүл тустууга чөмпүйэнээтигэр курдук элбэх киһи тоҕуоруспутун тоҕо эрэ көрө иликпин. Тоҕо эрэ билигин ыытыллар улахан түһүлгэлэргэ ол чөмпүйэнээти саныыбын уонна суолдьут сулус оҥостобун. Оччотооҕу дьон, дьэ, сүрдээҕин тэрийсибит эбиттэр.
Билигин федерация саҥа структуратынан салайтаран, тустуук бэтэрээннэр көҥүл тустууга уонна хапсаҕайга сэбиэттэрин бырабылыанньатын тэрийэргэ быһаарынныбыт. Балаһыанньа ылынан, онон салайтаран үлэлииргэ былааннанныбыт. Уопсай өйдөбүлэ биир: бэтэрээннэргэ көҥүл тустууну уонна хапсаҕайы сайыннарыынан эрэ муҥурдаммакка, бары өттүнэн киэҥ соҕус далааһыннаах үлэни ыытарга диэн.
Ону кэм-кэрдии, бириэмэ көрдөрүө дии саныыбын. Бэтэрээннэр улахан баай уопуттарын таба туһаныахха наада.
Федот СОЛОВЬЕВ, СӨ тустууга федерациятын бырабылыанньатын чилиэнэ, В.П. Керемясов аатынан Дьокуускайдааҕы 3 №-дээх спорт оскуолатын дириэктэрэ.
Петр ПАВЛОВ хаартыскаҕа түһэриитигэр: бэтэрээннэргэ аан дойду түһүлгэтигэр ситиһиилээхтик кыттыбыт бөҕөстөр Н.К.Алексеевка махталларын биллэрэллэр.