Быйыл Балыксыт күнэ Чурапчы сэлиэнньэтигэр уратытык ыытылынна.
edersaas.ru
Чурапчы улууһун уонна Чурапчы нэһилиэгин дьаһалталарын, “ОДьКХ” ГУТ улуустааҕы салаатын тэрийиилэринэн, бу күн Аҕа дойду улуу сэриитин бэтэрээнэ, Япония милитаристарын утары сэрии кыттыылааҕа, Чурапчытааҕы хомунаалынай хаһаайыстыба бастакы үлэһитэ, бананайдаах булчут, балыксыт Михаил Иванович Шестаков сырдык аатыгар Чурапчы күөлүгэр тыынан устуу күрэхтэһиитэ тэрилиннэ.
Күрэхтэһии от ыйын 12 күнүгэр Чапчаа тумулугар күнүс түөрт чаастан саҕаланна. Долгутуулаах дьаһал арыллыытыгар бииргэ үлэлээбит доҕотторун оҕолоро, настаабынньыктаабыт, үлэҕэ уһуйбут ыччаттара (билигин бэйэлэрэ дьоһун дьон) итиэннэ тилийэ тиэргэннээх, булкуйа буруолаах ыаллара Михаил Иванович туһунан истиҥ-иһирэх ахтыыны оҥордулар, кини бултаабыт арыытыгар стеланы арыйдылар. Онно кырдьаҕас булка илдьэ сылдьыбыт тыытын сөргүтэн, өйдөбүнньүк быһыытынан туруордулар.
Тыынан устуу күрэхтэһиитэ үс түһүмэҕинэн ыытылынна: 500 миэтэрэҕэ 18-44 саастаахтар итиэннэ 45-59 саастаах дьон илин былдьастылар, 60-тан аҕа саастаахтар 400 миэтэрэҕэ күөн көрүстүлэр. Хамаанда бэриллээтин кытары уонунан тыылаах киһи оскуола-интэринээт томторун анныттан Чапчаа тумулугар диэри анньынан кэбистилэр.
Тыылаахтар биэтэк диэки эрдэн күппээрдэн кэлиилэригэр, ыалдьааччылар ыһыылара-хаһыылара сүрдэннэ! Эдэрдэргэ Василий Степанов, орто саастаахтарга Петр Понамарев, аҕам саастаахтарга Дмитрий Назаров бастаатылар.
Кыайбыттарга уонна бириистээх миэстэҕэ тиксибиттэргэ тэрийээччилэр итиэннэ М.И.Шестаков оҕолоро олохтообут бириистэрэ туттарылыннылар.
«Саха сирэ» хаһыат, edersaas.ru. сайтыгар анаан Александр ЗАХАРОВ