Бу күннэргэ Хомсомуол күнүгэр араас тэрээһиннэр буолан аастылар.
Биһиги, бэйэбит кэммитигэр хомсомуолга актыбыыстаабыттар, Амма, Таатта, Мэҥэ Хаҥалас бэтэрээн быһый атахтаахтара хомуллан анаан сүүрдүбүт. Чапчылҕан – Бырама — Мэҥэ Хаҥалас — Эмис – Амма хайысханан сүүрүү аахсыйатын тэрийдибит. Сүүрүүктэр төрдүөбүт: Тааттаттан —Валентина Доргуева, Мэҥэ Хаҥаластан Мария Неустроева, Амматтан – Александра Ноева уонна эдэр сүүрүүк Ольга Наумова.
Биһигини кытта Амма оскуолаларын бэһис кылааhын сүүрүүк уолаттара Артур Федоров, Игорь Константинов сырыттылар. Оҕолорбут сүгэhэрдээх 100 км түмүктүүр биэтэккэ 2 км сүүрүстүлэр. Биһиги уhун сиргэ дьарык оҥостон сүүрбүппүт 15 сыл буолла. Сүүрүүгэ сөбүлээн дьарыктанар оҕолор биһигини таба тайаммыттарыттан үөрдүлэр аҕай.
— Киhи сылайбат гына сүүрэр эбиккит, — диэн оҕолорбут санааларын эттилэр. Ол быыһыгар сэрээккэнэн дьарыктанан ыллыбыт. Сорох уолаттар холонон көрөн баран, кыайбатылар. Дьаныардаах ыччаттарбытын кытта салгыы үлэлэһиэхпит.
Амма улууhун Эмис нэhилиэгин баhылыга Илья Пестерев таҥаспытын, аспытын тиэйэн арыаллаата. Онон сылайбакка сырыттыбыт. Биһигини өйөөбүт салайааччыга ис сүрэхпититтэн махталбытын тиэрдэбит.
Сүүрүүбүт олох хараҥаҕа түмүктэннэ. Дьон биһигини кэтэһэн туран күүппүтүттэн олус үөрдүбүт.
Үгүс дьон бу күннэргэ субуотунньуктаан, кэнсиэрдээн үбүлүөйдээх тэрээһиннэри ыытан бырааһынньыктаабыт буоллахтарына, биһиги Хомсомуол 100 сыллаах үбүлүөйүн Сүүрүү аахсыйатынан бэлиэтээтибит.
Валентина ДОРГУЕВА,
Таатта улууһа.
edersaas.ru саайтка анаан.
Хаартыскалар — ааптар архыыбыттан.