Өрөспүүбүлүкэҕэ бэтэрээн мадьынылар сүбэлэрэ тэриллиэҕэ

Ааптар: 
Бөлөххө киир:

Маннык быһаарыыны соторутааҕыта урукку сылларга ааттара-суоллара Саха сирин, Арассыыйа, аан дойду араас таһымнаах күрэхтэһиилэригэр ньиргийэн олорбут мас тардыһааччылар бэйэлэрин сүбэ мунньахтарыгар ылыннылар.

Бэтэрээн мадьынылар сүбэлэрэ сэттэ киһилээх буолара сабаҕаланар. Бастакы Дыгын оонньууларын үс төгүллээх чөмпүйүөнүн, мас тардыһыытыгар Саха сирин муҥутуур кыайыылааҕын, атах оонньуутугар Арассыыйа, өрөспүүбүлүкэ спордун маастарын Иннокентий Макаровы доҕотторо биир санаанан сүбэ тумус киһитинэн таллылар.

Мунньахха Манчаары Баһылай аатынан спорт национальнай көрүҥнэригэр киин дириэктэрэ, мас тардыһыытыгар аан дойдутааҕы федерация генеральнай сэкирэтээрэ, Ил Түмэн дьокутаата Иннокентий Григорьев кыттыыны ылла. Иннокентий Юрьевич маннык сүбэ тэриллэрин өйүүрүн эттэ, инникитин сүбэ үлэтигэр-хамнаһыгар көмө-тирэх буоларга эрэннэрдэ.

Бэтэрээн мадьынылар буолаары турар өрөспүүбүлүкэтээҕи федерация отчуоттуур-быыбардыыр мунньаҕар сүбэ салайааччытын Иннокентий Макаровы тэрилтэ президиумун састаабыгар таларга этии киллэрдилэр.

Владимир Шарин, саха биллиилээх мадьыныта, спорт бэтэрээнэ:

— Төһө да улахан спортан тэйдэрбит, билигин мас тардыһыытын сайыннарыыга үлэлии-хамныы сылдьар дьоммутугар, спортсменнарга, тириэньэрдэргэ сүбэ-ама буолар уонна спорт салайааччыларыгар тылбытын-өспүтүн тиэрдэр инниттэн маннык уопсастыбаннай тэрилтэни тэринэргэ быһаардыбыт. Тыа сирдэрин эмиэ хабан үлэлиэхпит, көлүөнэлэри ситимнээһини, мадьынылары сомоҕолооһуну болҕомто киинигэр тутуохпут.

Роман Попов, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0