Санкт-Петербург куоракка Саха сирин күннэрэ буола тураллар. Ол чэрчилэринэн, Россия этнографиятын музейыгар биһиги өрөспүүбүлүкэбит баайын-дуолун көрдөрөр улахан быыстапка аанын тэлэччи аста. Манна 130-тан тахса экспонат турда. edersaas.ru
Сир баайын хостоон туһаҕа таһаарыы – өрөспүүбүлүкэбит сүрүн дохуота. Итини таһынан бу хостоммут баайы, чуолаан күндү таастары, араастаан киэргэтэрбитинэн, уон араас уотунан күлүмүрдэтэ оонньоторбутунан, ювелирнай оҥоһуктарбытынан аар-саарга аатырабыт. Биһиги маастардарбыт айан таһаарбыт оҥоһуктара Россия атын регионнарын ааһан, тас дойдуга атыыланаллар.
Ил Дархан Егор Борисов итини бэлиэтээн туран, бу быыстапканан Саха сирин маастардарын талааннара, айар үлэлэрин уратыта көстөрүн эттэ. Быыстапкаҕа билиҥҥи маастардар үлэлэрин таһынан, XVII-XIX үйэлэрдээҕи оҥоһуктар, айылҕа бэйэтэ кырыылаан-нарылаан таһаарбыт ураты көстүүлээх күндү таастара, алмааһынан киэргэтиллибит Саха сирин каартата, гиэрбэтэ, улахан кээмэйдээх алмаастар, о.д.а. турдулар.
Санкт-Петербург губернатора Георгий Полтавченко икки регион хардарыта үлэлэһиилэрэ, ыалдьыттаһыылара үгэскэ кубулуйбутун, бу маннык көрсүһүүлэртэн Санкт-Петербург олохтоохторо, ыалдьыттара Саха сирин туһунан үгүһү билэн-көрөн, талааннаах үгүс дьонун кытары билсэн хаалалларын бэлиэтээтэ.
Бу быыстапка Россия биир улахан музейыгар ахсынньы 14 күнүгэр диэри туруоҕа.
Аграфена КУЗЬМИНА, “Саха сирэ” хаһыат, edersaas.ru.