Сочига буолуохтаах Ыччат уонна устудьуоннар XIX аан дойдутааҕы бэстибээллэригэр кыттааччылары сүүмэрдээһин буола турар. Бу күннэргэ тэрийэр хамыыһыйа араас хайысханан кыттыахтаах ыччаты талар. edersaas.ru
Билигин хас биирдии хайысхаҕа кэтэх сүүмэрдээһин бүтэн, сирэй көрсөн кэпсэтиилэр саҕаланнылар. Бу нэдиэлэ саҕаланыыта сүүмэрдээһини бастакынан «Эдэр IT-испэсэлиистэр», «Эдэр предпринимателлэр», «Экономика», “Экология”, “Доруобуйа”, “Суруналыыстыка” хайысхаларга оҥорбуттара.
Бүгүн Ыччат бэстибээлин регионнааҕы тэрийэр хамыыһыйата уонна экспертэр буоланнар “НКО лидердэрэ”, “Тыа сирин ыччата”, “Үлэлиир ыччат”, “Устудьуон бэйэни салайыныытын лидердэрэ”, “Бэлиитикэ”, “Норуоттар икки ардыларынааҕы эйэлээх сыһыан” уонна “Эдэр инженердэр” хайысхаларга сайаапка биэрбит ыччаты кытта сирэй көрсөн кэпсэттилэр.
Екатерина Петрова, сүүмэрдээһин кыттыылааҕа:
-Мин “Норуоттар икки ардыларынааҕы эйэлээх сыһыан” хайысхаҕа сайаапка биэрбитим. Сүүмэрдиир хамыыһыйа чилиэттэрэ элбэх интэриэһинэй боппуруостары ыйыттылар. Сааһын туппут, идэтигэр бигэтик тирэммит ыччаты бэстибээлгэ барарга талаллара буоллар, тоҕо диэтэр бу дьон ордук туһаныа, бэйэлэригэр саҥаны арынан, уопутуран кэлиэхтэрэ этэ дии саныыбын.
Василина Лукина, Ыччат дьыалаларын уонна дьиэ кэргэн бэлиитикэтин миниистирин бастакы солбуйааччы:
-Сорох хайысхаларга биир миэстэҕэ 30-50 хандьыдаат сайаапка биэрбит. Бүгүн сорох ыччаты кытта Хабаровскайтан, Москваттан сибээстэстибит. Аны улуустартан киирбит сайаапкалаах хандьыдааттарбытын кытары кэпсэтиэхпит, ол эрээри сайаапкаласпыт дьону барыларын кытта кэпсэтэбит диэн буолбатах. Хас биирдии сайаапкаһыт эрдэ анкета толорбута, анкета ситэтэ суох буоллаҕына кэпсэтиини ыыппаппыт.
Ыччат аан дойдутааҕы бэстибээлигэр Саха сириттэн 150 киһилээх делегация кыттыаҕа. Маныаха, кыттыан баҕалаах дьонтон сайаапка хомуйан, бу ый 1 күнүгэр регистрация түмүктэммитэ. Бу түмүгүнэн көрдөххө, Саха сириттэн бэстибээлгэ кыттыан баҕарарын уопсайа 756 ыччат биллэрбит эбит.ЫСПЫРААПКА:
XIX төгүлүн ыытыллар Аан дойдутааҕы ыччаттар уонна устудьуоннар бэстибээллэрэ алтынньы 14-22 күннэригэр Сочи куоракка ыытыллыаҕа. Бу бэстибээл Арассыыйаҕа үсүһүн буолар, бу иннинэ 1957 уонна 1985 сыллардаахха Москваҕа ыытыллыбыта.
Бэстибээлгэ 150 омук дойдутуттан 20 000 киһи кыттыыны ылара күүтүллэр. Биир былаһааккаҕа араас эйгэттэн эдэр лидердэр түмсүөхтэрэ: ыччат НКО-тун бэрэстэбиитэллэрэ, суруналыыстар, айар үлэһиттэр, спортсменнар, инженердэр, ыччат тэрилтэлэрин салайааччылара, үөрэх кыһаларын уһуйааччылара, устудьуоннар хамсааһыннарын лидердэрэ, учуонайдар уо.д.а. Маны тэҥэ, омук дойдутугар олорон нуучча тылын үөрэтээччилэр уонна чинчийээччилэр мустуохтара.
Ааспыт сыл ахсынньытыгар регионнааҕы бэлэмнэнэр кэмитиэт тэриллибитэ. Бэстибээлгэ Саха Өрөспүүбүлүкэтиттэн тэрээһиннэргэ көхтөөхтүк кыттар 150 ыччат кыттыыны ылыаҕа. edersaas.ru