Сочига буолуохтаах Ыччат уонна устудьуоннар XIX аан дойдутааҕы бэстибээллэригэр бэлэмнэнии үрдүк эппиэтинэстээхтик барар. Бу күннэргэ тэрийэр хамыыһыйа араас хайысханан кыттыахтаах ыччаты талар. edersaas.ru
Ол курдук, Ыччат аан дойдутааҕы бэстибээлигэр Саха сириттэн 150 киһилээх делегация кыттыаҕа. Маныаха, кыттыан баҕалаах дьонтон сайаапка хомуйан, бу ый 1 күнүгэр регистрация түмүктэммитэ. Бу түмүгүнэн көрдөххө, Саха сириттэн бэстибээлгэ кыттыан баҕарарын уопсайа 756 ыччат биллэрбит эбит. Билигин хас биирдии хайысхаҕа кэтэх сүүмэрдээһин бүтэн, сирэй көрсөн кэпсэтиилэр саҕаланнылар. Сүүмэрдээһини бастакынан «Эдэр IT-испэсэлиистэр», «Эдэр предпринимателлэр» уонна «Экономика» хайысхалара “Якутия” технопаарка базатыгар оҥордулар.
Роман ОКОНЕШНИКОВ, “Якутия” технопаарка дириэктэрин инновацияҕа солбуйааччы:
— Кэпсэтиигэ кэлбит дьон төһө даҕаны бэйэлэрин билиһиннэрэллэригэр кылгас кэм бэриллибитин үрдүнэн бэйэлэрин көрдөрдүлэр. Үгүстэрэ эдэр, ол эрээри номнуо уопуттаах, киэҥ билиилээх дьон кэлбитэ үөрдэр. Араас эйгэттэн бырайыак барылын кытта билистибит, хайаттан хостооһунтан саҕалаан социальнай предпринимательствоҕа тиийэ.
Оттон “Экология” уонна “Доруобуйа” хайысхаларга экспертэринэн Гражданскай уопсастыбаны сайыннарыы миниистирин бастакы солбуйааччы Иван Луцкан, Айылҕа харыстабылын министиэристибэтин судаарыстыбаннай сулууспа уонна кадровай бэлиитикэ отделын салайааччытын солбуйааччы Наталья Чиркова уонна медицинскэй колледж дириэктэрин солбуйааччы Светлана Васильева буоллулар. Бу хайысхаларга уопсайа 28 сайаапка киирдэ, онтон 19 ыччаты кытта сирэй көрсөн кэпсэттилэр.
“Суруналыыстыка” хайысхаҕа таллылыбыт суруналыыстар Ыччат бэстибээлин пресс-киинин тэрийэн үлэлэтиэхтэрэ. Онон таллылыбыт кэрэспэдьиэннэр, оператордар, блогердар нөҥүө Саха сирин делегациятын бэстибээлгэ үлэтин-хамнаһын кытта билсэ туруохпут. Бу хайысхаҕа кыттааччылары талар хамыыһыйа бэрэссэдээтэлэ “Саха сирэ” өрөспүүбүлүкэтээҕи хаһыат сүрүн эрэдээктэрэ Чокуур Гаврильев: “Сайаапка биэрбит суруналыыстар бары уопуттаахтар, үгүстэрэ бырайыак үлэлэтэллэр, араас форумнар, сүлүөттэр кыттыылаахтара буолаллар эбит. Ол эрээри, пресс-киин тэриллэр буолан, икки тылынан суруйар, тэлэбиидэнньэҕэ, араадьыйаҕа үлэлииргэ бэлэм, социальнай ситимнэри баһылаабыт дьону таллыбыт”.
Санатан эттэххэ, атын хайысхаларга кыттааччылары сүүмэрдээһин ыам ыйын 15 күнүгэр диэри ыытыллыаҕа.
ЫСПЫРААПКА:
XIX төгүлүн ыытыллар Аан дойдутааҕы ыччаттар уонна устудьуоннар бэстибээллэрэ алтынньы 14-22 күннэригэр Сочи куоракка ыытыллыаҕа. Бу бэстибээл Арассыыйаҕа үсүһүн буолар, бу иннинэ 1957 уонна 1985 сыллардаахха Москваҕа ыытыллыбыта.
Бэстибээлгэ 150 омук дойдутуттан 20 000 киһи кыттыыны ылара күүтүллэр. Биир былаһааккаҕа араас эйгэттэн эдэр лидердэр түмсүөхтэрэ: ыччат НКО-тун бэрэстэбиитэллэрэ, суруналыыстар, айар үлэһиттэр, спортсменнар, инженердэр, ыччат тэрилтэлэрин салайааччылара, үөрэх кыһаларын уһуйааччылара, устудьуоннар хамсааһыннарын лидердэрэ, учуонайдар уо.д.а. Маны тэҥэ, омук дойдутугар олорон нуучча тылын үөрэтээччилэр уонна чинчийээччилэр мустуохтара.
Ааспыт сыл ахсынньытыгар регионнааҕы бэлэмнэнэр кэмитиэт тэриллибитэ. Бэстибээлгэ Саха Өрөспүүбүлүкэтиттэн тэрээһиннэргэ көхтөөхтүк кыттар 150 ыччат кыттыыны ылыаҕа.