«Кыһын Саха сириттэн саҕаланар» бэстибээл — куйаар ситиминэн...
Олох-дьаһах

«Кыһын Саха сириттэн саҕаланар» бэстибээл — куйаар ситиминэн

«Кыһын Саха сириттэн саҕанар» кыһыҥҥы туризм бэстибээлэ бэҕэһээҥҥиттэн, сэтинньи 25 күнүттэн, саҕаланна.

edersaas.ru

Кыһыҥҥы туризм бэстибээлэ ахсынньы 6 күнүгэр диэри ыытыллыаҕа. Сыстыганнаах дьаҥынан сибээстээн бары тэрээһиннэр куйаар ситиминэн ыытыллыахтара.

2021 сылга «Кыһын Саха сириттэн саҕаланар» кыһыҥҥы туризм бэстибээлин 10 сыллаах үбүлүөйүн бэлиэтиэхпит. Бу сыллар тухары тэрээһин Арассыыйатааҕы таһымнаах тэрээһиҥҥэ тиийэ үүннэ. Быйыл онлайн-эрэсииминэн ыытыллара эмиэ да табыгастаах курдук — ол эбэтэр бары тэрээһиннэри ким интэриэһиргиир   социальнай ситимнэр нөҥүө аан дойду араас муннугуттан киирэн көрүөн  сөп буолла, — диэн предпринимательство уонна туризм дьыалатын миниистирэ Ирина Высоких бэлиэтээтэ.

Быйыл үгэс быһыытынан сыл аайы ыытыллар тэрээһиннэр бары бааллар. Ол курдук,  «Саха сирин бриллианнара» муус уонна хаар оҥоһуктар күрэстэрэ сэтинньи 25 күнүгэр Орджоникидзе болуоссатыгар блиц-турниртан саҕаланна. Сэтинньи 26-30 күннэригэр «Хотугу дьүкээбил» («Северное сияние» (202 мкр.) муус пааркатыгар муус уонна хаар оҥоһуктарга маастардар күрэхтэһиилэрэ ыытыллыаҕа.

«Үрүк көмүс хатырык» («Серебряная чешуя») куонкурус быыстапка куйаар ситиминэн Instagram @upravlenie_cultury_yakutsk сэтинньи 27-30 күннэригэр ыытыллыаҕа. Манна балык тириититтэн, уҥуоҕуттан араас оҥоһуктар быыстапкалара буолуоҕа. Маны таһынан, «Саха сирин амтана» («Вкус Якутии») саха аһын бэстибээлэ сэтинньи 30 күнүттэн ахсынньы 6 күнүгэр диэри ыытыллыаҕа.

Сэтинньи 30 күнүгэр Тымныы полюһугар Өймөкөөҥҥө Тымныы хаһаайына Чысхаан бэйэтин Резиденциятыттан — Эбэ Хайатын хаспаҕыттан Тымныы символын хостоон, Саха сирин улуустарыгар чысхаан тымныыны тарҕатыаҕа. Дьиктитэ баара, остуоруйа тэрээһинэ курдук да, хаһыс да сылын Чысхаан тымныыны тарҕатаатын кытта, сарсыныгар өрөспүүбүлүкэ улуустарыгар улахан тымныы түһэр. Бу күн өймөкөөннөр «Тымныы полюһа — Өймөкөөн турист хараҕынан» диэн Өймөкөөн улууһун 100 cыллаах үбүлүөйүн чэрчитинэн ыытыллыбыт хаартыска уонна видео-куонкурус түмүгүн  таһаарыахтара.

Сайаапкалары ылыы сэтинньи 25 күнүгэр  түмүктэммитэ. Бу манна Тымныы полюһугар Өймөкөөҥҥө турист быһыытынан сылдьыбыт дьон кыттыыны ыллылар.

Биллэн турар, ахсынньы 1 күнүгэр СӨ Ил Дарханын Саҥа дьыллааҕы харыйатын уота Ленин болуоссатыгар — 15.30 ч., Орджоникидзе болуоссатыгар — 16.00 ч. күлүмүрдүү умайалларын  «Саха» НКИХ, Youtube-ханаалга, Instagram @upravlenie_cultury_yakutsk социальнай ситимҥэ көстүөҕэ.

 

Елена ПОТОЦКАЯ, «Cаха сирэ» хаһыат, edersaas.ru

 

Хаартыскалар — 1 sn.ru, СИА.

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

пятнадцать − три =