«Кыһын Саха сириттэн саҕаланар» бэстибээл хаартыска марафонуттан саҕаланна

Ааптар: 
Бөлөххө киир:

Бүгүн ыччат «Пространство» айар дьиэтигэр «Ниже нуля» диэн хаартыскаҕа түһэрии марафона саҕаланна.

Үс чаас устата Максим Аммосов аатынан Хотугулуу-Илиҥҥи федеральнай университекка үөрэнэр омук устудьуоннара уонна преподавателлэрэ, ону тэҥэ Саха сиригэр олохсуйан олорор араас омук сирин дьоно анал бэриллибит сорудаҕы толоруохтара.

Тэрээһини Дьокуускай куорат уокуруктааҕы дьаһалтатын Култуураҕа уонна духуобунаска управлениета тэрийэн ыытар.

Бырайыак ааптара Алена Колосова бу тэрээһини уруккуттан дууһатыгар иитиэхтии сылдьан баран, быйыл «Кыһын Сахан саҕаланар» кыһыҥҥы туризм бэстибээлин анал бырагырааматыгар киллэттэрбит. Кэрэхсэбиллээҕэ баар, 20-тэн тахса кыттыан баҕалаах киһи суруттарбыт.

Словакияттан сылдьар Мариан Пециар Дьокуускайга олорбута алта сыл буолбут. Онон кини Саха сирин номнуо бэйэтин дойдутунан ааҕар.

Мин Католическай Таҥара дьиэтигэр сулууспалыыбын. Чугастааҕы улуустар ыҥырыыларынан нэһилиэктэргэ английскай тылы үөрэтэн кэлэбин. Саха сирин тымныытын тулуйабын. Буолаары буолан, олус сөбүлүүбүн да диэхпин сөп. Уоппускабар дойдубар баран кэлээри гыннахпына, Дьокуускайбын олус ахтан кэлэбин. Онон, Саха сирэ — мин иккис дойдум. Бу тэрээһин туһунан билэр киһим: «Кытын», — диэн этэн, анаан кэллим. Маннык хайысхалаах тэрээһин биһиги дойдубутугар чаастатык ыытыллар. Онон сорудах ис хоһоону билэбин. Бастаан бааһынай ырыынагыттан саҕалыам. Саамай онно буоллаҕа дии, олох күөстүү оргуйара! — диэн санаатын үллэһиннэ Мариан.

Кыттааччыларга «Тымныы куорат сылаас тыына»  диэн бэрт истиҥ ис хоһоонноох сорудах бэрилиннэ.

Киргизияттан сылдьар ХИФУ устудьуона Нуриза таҥаһын таҥнаат, сорудаҕы толоро сүүрдэ. Кини таҥна туран: «Наһаа үчүгэй ис хоһоонноох сорудах түбэстэ. Мин уулуссаҕа сылдьан, Дьокуускай олохтоохторун сылаас мичээрдэрин анаан түһэриэм», — диэн санаатын үллэһиннэ.

Ыччат сорудаҕы ылаат, ким ханна баҕарарынан, тиэтэйэ-саарайа, сорудахтарын толоро ыстаннылар. Кинилэр үс чаас устата «Тымныы куорат сылаас тыынын»  анаан көрдөөн булуохтара. Араас омук дьонун Дьокуускай сылаас тыынын көрүүлэрэ сылаас тохтобулларга ыйаныахтара. Өрөбүл күн «Кыһын Саха сириттэн саҕаланар» бэстибээл үөрүүлээх сабыллыытыгар кыайыылаахтары «Триумф» спортивнай кииҥҥэ наҕараадалары туттарыахтара. Кыттааччыларга барыларыгар ситиһиини баҕарабыт!

Елена ПОТОЦКАЯ, «Саха сирэ» хаһыат, edersaas.ru

Хаартыскаҕа ааптар түһэриитэ.

+1
0
+1
0
+1
0
+1
0
+1
0
+1
0
+1
0