Саха омук мындыр сытыы өйдөөх диэн мээнэҕэ эппэттэр. Сочи куоракка ыытылла турар аан дойду ыччатын бэстибээлигэр дуобат күрэхтэһиитигэр саха шашистара Степанида Кириллина уонна Иван Старостин бастакы уонна иккис миэстэни ылбыттара ити этиини бигэргэтэр. edersaas.ru
Степанида Бүлүүттэн төрүттээх Сочи куоракка олорор гроссмейстер кыыс. Кини үрдүк таһымнаах спортсмен буолан бастакы миэстэҕэ тигистэ. Оттон Иван ХИФУ естественнэй наукаларын институтун 4 кууруһун устудьуона буолар. Кини мас тардыһыытынан анаан дьарыктанар. Маһы тардар быччыҥнаах эрэ буолбакка, Иван сытыы өйдөөҕүн аан дойду ыччатын бэстибээлигэр бигэргэттэ.
Иван Старостин, бэстибээл дэлэгээтэ, устудьуон:
— Мин бэстибээлгэ кэлиэм иннинэ саахымат күрэхтэһиитэ буолар диэн истибитим. Онтон кэлин истибитим, дуобат күрэхтэһиитигэр уларыппыттар эбит. Мин дьиэ кэргэммэр бары шашкаҕа үчүгэйдик оонньуур буоланнар, мин эмиэ оҕо эрдэхпиттэн оонньуубун. Күрэхтэһиигэ 16 араас дойдуттан спортсменнар кыттыбыттара. Бастакы эргиирдэрбэр Санкт-Петербург, Англия, Литва уонна Нигерия дуобатчыттарын кыайбытым. Финалга саха гроссмейстер кыыһын Степанида Кириллиналыын тахсыбыппыт. Кини таһыма олох үрдүк буолан баһыйтараммын, иккис миэстэ буоллум. Ол эрээри, сахалар буолан финаллаабыппыт үөрүүбүн икки төгүл үрдэтэр.
Николай Попов, «Саха сирэ» хаһыат, edersaas.ru