Бүгүн күнүс “Саха сирэ” хаһыат эрэдээксийэтигэр Горнай улууһун Бэс Күөлүгэр иллэрээ сыл эдэр фермердэргэ анаммыт гранынан сүөһү атыыласпыт бааһынай хаһаайыстыбатыгар уон биэс ынах сүөһү өлбүтүн туһунан cурах иһиллибитэ. Бу чахчытын-сымыйатын билээри биһиги Тыа хаһаайыстыбатын уонна ас-үөл бэлиитикэтин министиэристибэтигэр төлөпүөннүү сырыттыбыт итиэннэ маннык хоруйу туттубут:
— Ити туһунан иһитиннэрии биһиэхэ бэҕэһээ киэһэ киирбитэ. Уон биэс сүөһү барыллааһын быһыытынан, туохтан эрэ атарабыы буолан эбэтэр угаардаан өлбүт курдуктар. Бу сарсыарда бэтиринээрдэр тиийэн, өлбүт сүөһүлэр хааннарыттан анаалыс уонна куртахтарыгар баар астан боруоба ыланнар, лабораторияҕа чинчийэ сылдьаллар. Ол чинчийии түмүгүнэн сүөһүлэр өлбүт биричиинэлэрэ быһаарыллыаҕа.
Раиса Сибирякова, “Саха сирэ” хаһыат, edersaas.ru