Ойуур баһаардарын күннээҕи балаһыанньатын туһунан СӨ Экология миниистирэ Сахамин Афанасьев иһитиннэрэр:
— Өрөспүүбүлүкэ суһал ыстааба Үөһээ Бүлүү, Ньурба, Сунтаар улуустарыгар тыҥааһыннаах сирдэргэ үлэлии сылдьар. Уот күөдьүйбүт сирдэрэ хонтуруолга тутуллаллар, хас биирдии ойуур баһаарын умулларар ньыманы көрдөөһүн үлэтэ тиһиктээхтик бара турар. Бүгүҥҥэттэн Бе-200 үлэлээн барыа, умуруорууга туһаныллар үп саппаас пуондаттан министиэристибэҕэ киирдэ. Уоту умуруорар сиргэ федеральнай десантниктары тиэрдиинэн дьарыктана сылдьабыт.
СӨ Экология, айылҕаны туһаныы уонна ойуур хаһаайыстыбатын министиэристибэтин чахчыларынан, бэс ыйын 6 күнүгэр, ойуур баһаардарын умуруорууга 1531 киһи кыттыыны ыла сылдьар:
— «Авиалесоохрана» ГБУ — 310 киһи;
— «Якутлесресурс» ГАУ уонна лесничество үлэһиттэрэ — 146 киһи;
— РФ ЫБММ — 30 киһи;
— Олохтоох нэһилиэнньэ — 1029 киһи;
Ойуур уотун утары үлэҕэ 205 араас тиэхиньикэ туһаныллар.
«Саха сирэ» хаһыат, edersaas.ru
Хаартыска СИА