Ытыктабыллаах Саха сирин бааһынай хаһаайыстыбаларын уонна кэпэрэтииптэрин үлэһиттэрэ!
edersaas.ru
Саха сирин бааһынайдарын уонна кэпэрэтииптэрин Ассоциациятын ааттарыттан, Эһигини, тыа хаһаайыстыбатын бородууксуйатын оҥорооччулары, Арассыыйа бааһынайдарын (фермердэрин) идэлээх бырааһынньыкпытынан уонна өбүгэлэрбит олохтообут сайыҥҥы күн муҥутаан уһаабыт кэмин уруйдуу-айхаллыы көрсөр, Үрдүк Айыылар мэҥэ халлаантан Сир Ийэҕэ үктэнэр, айылҕа саҥалыы төрүүр-ууһуур, силигилии ситэр күнүгэр саха киһитэ үҥэр-сүктэр, көрдөһөр-ааттаһар, алгыс ылар үрдүк аналлаах Үрүҥ Тунаҕынан кынаттаммыт кэтэһиилээх самаан сайыммыт салаллан кэлбитинэн итиитик-истиҥник эҕэрдэлиибин!
Саха дьоно бу тымныы, тыйыс айылҕалаах дойдуну баһылаан, сүөһү, сылгы, таба ииттэн, бурдук ыһан, кэнчээри ыччаты тэнитэн кэлбиттэрин бүгүн аан дойду дьоно барыта сөҕө көрөр, истэн соһуйар. Маны ситиһэргэ саха киһитэ ураты майгыта, олоххо дьулуура, санаатын күүһэ көмөлөспүтэ. Дьиҥнээх саха киһитин тулхадыйбат өрүттэрин: киэҥ холку майгытын, ыарахаттартан, күүрээннээх үлэттэн чаҕыйбат тулуурдарын, төлкөлөөх муударай өйдөрүн-санааларын эһиги чиэстээхтик сүгэ сылдьаҕыт. Эһиги, үтүө суобастаах сыралаах, таһаарыылаах үлэҕитинэн өбүгэлэрбит төрүт дьарыктара үйэлэргэ симэлийбэккэ салгыы чэчирии сайдарыгар, тыа сиригэр үлэ миэстэтин таһааран, тыа дьоно-сэргэтэ, дьиэ-уот туттан, оҕо-уруу тэнитэн олохсуйарыгар, төрөөбүт тылбыт симэлийбэтигэр, саха омук баар буоларын туһугар сүдү кылааккытын киллэрэҕит.
Ытыктабыллаах Саха сирин бааһынай хаһаайыстыбаларын уонна кэпэрэтииптэрин үлэһиттэрэ, Эһиги тыа сиригэр ураты бэриниилээхтик, өрөспүүбүлүкэбит социальнай-экэнэмиичэскэй сайдыытыгар ис сүрэххититтэн күүскүтүн-уоххутун ууран туран үлэлииргитин АККОР Саха сиринээҕи салаата үрдүктүк сыаналыыр. Ийэ айылҕабыт кылгас сайынын күөх быйаҥыттан сомсон, көдьүүстээхтик туһанан, үрүҥ илгэни үрүлүтүөҕүҥ, алаастартан, сыһыылартан күөх быйаҥы сомсон ылыаҕыҥ. Тыа хаһаайыстыбатын бородууксуйатын оҥоруу тэтимин үрдэтэн, экология өттүнэн ыраас, дьон доруобуйатын бөҕөргөтөр, араас ыарыылартан харыстыыр олохтоох аһынан-үөлүнэн хааччыйыы тэтимин үрдэтиэҕиҥ.
Эһиэхэ тулхадыйбат доруобуйаны, уһун, дьоллоох, чөл олоҕу, дьоһун-мааны кэнчээри ыччаттаргытыгар кэхтибэт кэскили баҕарабын! Коронавирус дьаҥа биһиги эппиэттээх үлэбитигэр харгыстары таһаарбатын, бэйэҕитин харыстанар дьаһаллары тутуһа сылдьыҥ. Эһигини кытта мэлдьитин кэрэ ыра кэккэлэстин, күннэтэ күүстээх санаа эҥээрдэстин, тыа сирэ сайдарын туһугар таһаарыылаах үлэҕит, олоххут кэрэһилэннин, сарсыҥҥы күҥҥүт саргылаах буолуохтун диэн алгыспын этэбин!
Истиҥ эҕэрдэни кытта, Бүтүн Арассыыйатааҕы Бааһынай хаһаайыстыбалар уонна кэпэрэтииптэр ассоциацияларын (АККОР) Саха сиринээҕи салаатын Бэрэсидьиэнэ Александр Артемьев, «Саха сирэ» edersaas.ru саайтка анаан