Икки ыйынан Саха сиригэр федеральнай телеханаалларга сыыппаранан эфирнэй биэриилэр олоххо киириэхтэрэ.
edersaas.ru
Бу ый саҥатыгар өрөспүүбүлүкэ нэһилиэнньэлээх пууннарыгар сыыппараҕа киириигэ бэлэмнэнии үлэтэ хайдах баран иһэрин билсээри, Ил Дархан Айсен Николаев кэккэ миниистир уонна тустаах тэрилтэ салайааччылара кыттыылаах мунньаҕы тэрийэн ыыппыта. Маны тэҥэ бу тэрээһиҥҥэ эрэгийиэннээҕи телеханааллар салгыы сайдар кыахтарын эмиэ дьүүллэспиттэрэ.
Мунньахха Инновация министиэристибэтин эппиэттээх үлэһиттэрэ иһитиннэрбиттэринэн, сыыппаранан эфирнэй телебиэриилэри хабыы зонатыгар Саха сирин 390 нэһилиэнньэлээх пууна киирэр. Ол эбэтэр өрөспүүбүлүкэ нэһилиэнньэтин 95%-на сыыппаранан тэлэбиидэнньэ 10 ханаалын көрөр кыахтаах. Сыл түмүгэр ханаал 20-ҕэ тиийэ элбиэҕэ.
Тустаах исписэлиистэр дьону-сэргэни сыыппаранан эфирнэй телебиэриилэри холбуурга 500 волонтеру үөрэттилэр. Саха сирин нэһилиэнньэлээх пууннарыгар сыыппаранан көрдөрөр телебиэриилэри көрүүгэ туттуллар приставкалар төһө тиийэллэрин үөрэтии барар.
Бу күннэргэ сыыппаранан эфирнэй телебиэриилэри көрдөрүүгэ бэлэмнэнии хайдах баран эрэрин туһунан Бырабыыталыстыба бэрэссэдээтэлин солбуйааччы Кирилл Бычков суруналыыстарга билиһиннэрдэ.
— Тэлэбиидэнньэ биэриилэрин сыыппаранан көрдөрүүгэ бэс ыйын 3 күнүгэр көһүөхпүт. Олохтоох нэһилиэнньэ сыыппаранан көрдөрүү тэрилин эрдэттэн атыылаһан, тэлэбиидэнньэ сонун көрүҥүн баһылааһыны көхтөөхтүк саҕалыылларыгар үлэ барар, — диэн бэлиэтиир Кирилл Бычков.
Кэлиҥҥи кэмҥэ Саха сиригэр сыыппаранан эфирнэй телебиэриилэри көрдөрөр 211 эбийиэк тутулунна. Ол эбэтэр нэһилиэнньэ 95%-на (916 тыһ. киһи) сыыппаранан тэлэбиидэнньэни көрөр кыахтаах. Билиҥҥи туругунан 48 тыһ. киһи сыыппаран тэлэбиидэнньэни көрүү зонатыгар киирбэт.
Бүгүҥҥү күҥҥэ тэлэбиисэри ханнык ньыманан көрөллөрүй?
— кабель нөҥүө (9 799 дьиэ хаһаайыстыбата);
— IP-TV (73 471 дьиэ хаһаайыстыбата);
— Спутник нөҥүө (НТВ-ПЛЮС, Орион-Экспресс, МТС, Триколор ТВ) (220 тыһ. дьиэ хаһаайыстыбата);
— мобильнай оператордар платформалара уонна сервистэрэ.
«Приставка атыылаһыахтарын иннинэ дьон бэйэлэрин тэлбиисэрдэрин бэрэбиэркэлиэхтэрин наада. Үгүс модельга сыыппаранан көрдөрөр тэлэбиидэнньэ сигналын приемнига холбонон сылдьар», — диэн СӨ Бырабыыталыстыбатын Бэрэссэдээтэлин солбуйааччы Кирилл Бычков анаан бэлиэтээтэ. Сыыппаранан тэлэбиидэнньэҕэ көһүүгэ сүбэлэтиэн баҕалаахтар 8 800 350 14 14 нүөмэргэ босхо эрийэн билсиэхтэрин сөп. Маны тэҥэ 1-кы уонна 2-с группалаах инбэлииттэргэ уонна нэһилиэнньэ кыаммат араҥатыгар спутниковай телебиэрии тэрилин атыылаһыыга үлэ ыытыллар.
Елена ПОТОЦКАЯ, «Саха сирэ» хаһыат, edersaas.ru
Хаартыска — интернеттэн.