Бэс Күөлгэ уһулуччу үөрүүлээх күн үүннэ, саҥа оскуола атаҕа түһэрилиннэ.
Горнай улууһугар Бэс Күөлгэ В.Д.Лонгинов аатынан саҥа таас оскуола атаҕын түһэрии үөрүүлээх түгэнигэр СӨ Ил Дархана Айсен Николаев кыттыыны ылла. Саҥа кыһа РФ Бэрэсидьиэнэ В.Путин сорудаҕынан тутуллар.
— Бэс Күөлгэ бүгүн чахчы да ураты күн. Мин сэлиэнньэ уонна Горнай улууһун бары олохтоохторун үөрүүлэрин үллэстэбин. Бүгүҥҥүттэн РФ Бэрэсидьиэнэ Владимир Владимирович Путин сорудаҕынан, саҥа оскуоланы тутуу үлэтэ саҕаланна. Былырыын манна эмсэҕэлээбит кыбартаал дьиэлэрин барытын чөлүгэр түһэрэргэ үлэ ыытыллыбыта. Оттон быйылгыттан 150 оҕо үөрэнэригэр икки мэндиэмэннээх таас оскуоланы тутуу саҕаланна. Эбийиэк федеральнай уонна өрөспүүбүлүкэ үбүнэн тутуллуо«, — диэтэ Айсен Николаев.
Санатан эттэххэ, былырыын ойуур баһаардарын содулун боппуруостарынан сүбэ мунньахха РФ Бэрэсидьиэнигэр В.В.Путиҥҥа СӨ Ил Дархана Айсен Николаев Бэс Күөлгэ социальнай эбийиэктэри тутарга өйөбүл көрдөөбүтэ, ол иһигэр оскуоланы тутууну эмиэ бэлиэтээбитэ. Мас оскуола манна 1982 сыллаахха тутуллубут.
Оскуола дириэктэрэ Мотрена Ефремова эргэ оскуола бастакы мэндиэмэнэ олус тымныытын уонна, уопсайынан, хапытаалынай өрөмүөн ыытыллара наадатын бэлиэтиир. Оскуолаҕа барыта 134 оҕо үөрэнэр.
«Саҥа оскуолаҕа успуорт саалата, мастарыскыайдар баар буолуохтаахтар. Дойдубут Бэрэсидьиэнигэр уонна өрөспүүбүлүкэбит, улууспут салалталарыгар махтанабыт«, — диир кини.
Саҥа оскуола тутуутун 2023 сыл бүтүөр диэри түмүктүүр былааннаахтар. Кыһа миэбэлинэн, үөрэтэр-лабораторнай тэрилинэн, компьютердарынан, интерактивнай дуоскаларынан хааччыллыахтаах. Бэдэрээччит «Союз» ХЭУо. Бырайыак быһыытынан саҥа оскуолаҕа үөрэнэр кылаастары, мастарыскыайдары таһынан, актовай уонна успуорт саалалара, бибилэтиэкэ, остолобуой, медкабинет, уо.д.а. былааннаналлар.
Хаартыскаларга Андрей Сорокин (СИА) түһэриитэ
+1
+1
+1
+1
+1
+1
+1