Маны аах Уопсастыба

Бэс Күөлэ: атырдьах ыйыгар уонна бүгүн

Бэс Күөлүгэр ойуур баһаарыттан алдьархай буолбутун кэнниттэн тута чөлүгэр түһэрии үлэлэрэ саҕаламмыттара. Атырдьах ыйын 20 күнүгэр бастакы дьиэ атаҕа түһэриллибитэ уонна тутааччылар түүннэри-күнүстэри үлэлээбиттэрин түмүгэр,  биир ый кэриҥинэн,  балаҕан 28, алтынньы 1 уонна 9 күннэригэр  барыта 20 ыалга  саҥа дьиэ  күлүүстэрин  туттарбыттара.

Бүгүҥҥү тэрээһиҥҥэ СӨ Бырабыыталыстыбатын бэрэссэдээтэлин 1-кы солбуйааччы, Бэс Күөлүгэр ойуур баһаарыттан эмсэҕэлээбит «Кэскил» түөлбэни чөлүгэр түһэриигэ хамыыһыйа салайааччыта Владимир Бердников, тутааччылар, олохтоохтор кыттыахтара.

 

Хайдах этэй?

Атырдьах ыйын 7 күнүгэр  Бэс Күөлүгэр «Кэскил» түөлбэҕэ  ойуур баһаара киирэн, 30-тан тахса дьиэни, хаһаайыстыбаннай 8 тутууну имири сотон ааспыта. Ити күн Ил Дархан Айсен Николаев  уокка былдьаммыт түөлбэни чөлүгэр түһэрэр  суһал ыстаабы тута тэрийбитэ.

Бэс Күөлүн чөлүгэр түһэрии үлэтэ хайдах-туох барарын РФ Бэрэсидьиэнэ Владимир Путин ураты болҕомтоҕо тутар, үлэ хаамыытын РФ Бырабыыталыстыбатын бэрэссэдээтэлин солбуйааччы – РФ бэрэсидьиэнин Уһук Илин Федеральнай Уокурукка боломуочуйалаах бэрэстэбиитэлэ Юрий Трутнев  хонтуруоллаата.

Ойуур баһаара Бэс Күөлүн иһинэн ааспытын кэнниттэн   дьиэлэрэ эмсэҕэлээбит 170-тан тахса киһиэхэ биир кэмнээх көмө харчы тута бэриллибитэ.
Атырдьах ыйын 14 күнүгэр РФ Бырабыыталыстыбатын бэрэссэдээтэлин солбуйааччы – РФ бэрэсидьиэнин Уһук Илин Федеральнай Уокурукка боломуочуйалаах бэрэстэбиитэлэ Юрий Трутнев   Бэс Күөлүгэр кэлэн, балаһыанньаны билсибитэ. Ити  сырыы кэнниттэн  «АЛРОСА» АХ  дьиэлэри тутууга 200 мөлүйүөн солкуобайы көрөрө быһаарыллыбыта.
Атырдьах ыйын 15 күнүгэр  ойуур баһаарын туоратыы мунньаҕар  Ил Дархан Айсен Николаев  Бэс Күөлүн оҕолорун  «Орленок»  уонна «Океан» сайыҥҥы лааҕырдарга сынньата ыытар туһунан этиитин РФ Бэрэсидьиэнэ Владимир Путин өйөөбүтэ уонна улахан дьону  санаторийдарга  ыытарга, ону тэҥэ Бэс Күөлүгэр  кэлэр сылга социальнай хабааннаах эбийиэктэри тутарга сорудахтаабыта.

Ити мунньах кэнниттэн атырдьах 27  күнүгэр  Бэс Күөлүттэн маҥнайгы бөлөх, ону тэҥэ Бүлүү, Уус Алдан, Чурапчы, Хаҥалас уонна Дьокуускай куораттан барыта 170 киһи Арассыыйа киин куораттарын санаторийдарыгар доруобуйаларын бөҕөргөтүнэ  көппүттэрэ.

 

 

Туох көмө оҥоһулунна

— Бэс Күөлүгэр ойуур баһаарыттан эмсэҕэлээбит 171 киһиэхэ бастаан утаа туһаналларыгар 30-туу тыһыынча  солкуобай бэриллибитэ. Барыта 5,7 мөлүйүөн солкуобай түҥэтиллибитэ.

— Матырыйаалынай көмө быһыытынан 710 тыһыынча солкуобай уонна Бэс Күөлүгэр ойуур баһаарыгар  дьиэлэрэ-уоттара, хаһаайыстыбалара, тиэхэньикэ лэрэ эмсэҕэлээбит 142 киһиэхэ   2 мөл. 840 тыһыынча солкуобай түҥэтиллибитэ.

— Бэс Күөлүгэр  30 ыал ыарахан балаһыанньаҕа түбэспиттэринэн аадырыстаах көмө быһыытынан 2 мөлүйүөн 296 тыһыынча солкуобай түҥэтиллибитэ.

Александр Тарасов, edersaas.ru

0
0