Бэс Күөл сэлиэнньэтин олохтоохторугар социальнай көмө түргэнник оҥоһуллуоҕа
Ойуур баһаарыттан эмсэҕэлээбит Горнай улууһун Бэс Күөл сэлиэнньэтигэр дьиэлэри чөлүгэр түһэрии үлэтин сэргэ, бэнидиэнньиктэн саҕалаан олохтоохторго барыларыгар компенсация оҥоһуллан барыаҕа. Үлэ министиэристибэтэ уонна улуустааҕы дьаһалта сэлиэнньэ олохтоохторун чопчу испииһэгин оҥорон эрэллэр.
Баһаартан эмсэҕэлээбит хас биирдии киһиэхэ биир кэмнээх 30 тыһ. солк. төлөбүр оҥоһуллуоҕа. Бу туһунан Ил Дархан Айсен Николаев бырабыыталыстыба мунньаҕар бүгүн иһитиннэрдэ.
«Олохтоохтор көмө кэтэһэллэр. Онон көмө көдьүүстээх буоларын таһынан, түргэнник оҥоһуллуохтаах», – диэн Айсен Николаев тоһоҕолоон бэлиэтээтэ.
Маны таһынан Айсен Сергеевич премьер Андрей Тарасенкоҕа кылгас кэм иһигэр сэлиэнньэ оҕолорун Арассыыйа лааҕырдарыгар ыытыы боппуруоһун уталыппакка быһаарарыгар сорудахтаата.
Билиҥҥитэ 124 миэстэ Дьокуускайга «Сосновый Бор» лааҕырга бэлэмнэннэ.
Доруобуйа харыстабылын министиэристибэтин чахчыларынан, ааспыт сууккаҕа сэлиэнньэ олохтоохторуттан 61 киһи буруоттан сылтаан доруобуйалара мөлтөөбүтүнэн балыыһаҕа көрдөрбүттэр. Көрдөрбүт дьон бары амбулаторно эмтэнэллэр.
Аҕам саастаах дьон доруобуйаларын санаторийга чөлүгэр түһэриниэхтэрэ.
СӨ Ил Дарханын уонна бырабыыталыстыбатын пресс-сулууспата
+1
+1
+1
+1
+1
+1
+1