Айылҕа харыстабыла Сүрүн Тыа хаһаайыстыбата Уопсастыба

Бэс Күөл олохтоохторугар көмөнү оҥоруу үлэтэ саҕаланна

Саха сирин Ил Дархана Айсен Николаев дьаһалынан ойуур баһаарыттан эмсэҕэлээбит Горнай улууһун Бэс Күөл сэлиэнньэтин олохтоохторугар тута көмө оҥоһуллуоҕа.

Бу дьаһал быстах кэмҥэ хоннорор пууннары тэрийиини, оройуон киинин куораты кытта суолунан сибээһи олохтооһуну, харчынан, эминэн-томунан көмөнү оҥорууну, дьиэ-уот сөргүтүүтүгэр тирэх буолууну барытын хабар. Бу дьаһалы сөптөөх кэмҥэ толорор туһугар өрөспүүбүлүкэ премьерэ Андрей Тарасенко миниистииэристибэлэри уонна аналлаах дьаһалталары кытта сүбэ мунньах ыытта.

Билиҥҥи  иһитиннэриинэн уокка 15 олорор дьиэ уонна 8 хаһаайыстыбаннай тутуу былдьаммыт. Уоттан 225 дьиэни быыһаабыттар. Тарасенко этэрин, тахсыбыт хоромньу сууматын быһаарыы уонна дьиэни-уоту сөргүтүү үлэлэрэ саҕаламмыттар. Тыа хаһаайыстыбатын министиэристибэтэ бааһынай хаһаайыстыбаларга  тахсыбыт хоромньуну ааҕыаҕа. Ахсаан-суот түмүгүнэн оҥоһуллар көмө уочарата олохтонуоҕа.

Оройуонтан нэһилиэктэригэр барыан баҕалаахтарга оптуобустар сырыылара тэриллиэҕэ. Бу миэрэ айан-сырыы бэрээдэктээн буолуутун хааччыйыаҕа уонна трассаҕа үмүөрүһүүнү намтатыаҕа. Билигин Бэс Күөлтэн Бэрдьигэстээххэ 79 киһи тииийбитэ, олортон 60 оҕолор. Бэрдьигэстээххэ быстах кэмҥэ олордор пууннар тэриллибиттэр: интэринээт-оскуолаҕа уонна элбэх хайысхалаах успуорт киинигэр. Дьону быстах кэмҥэ олохтуур пууннарга барыларыгар утуйар сирдэр тэриллибиттэр (раскладушкалар уонна утуйар мөһөөччүктэр), 300-тэн тахса кэмпилик бэлэмнэммит.

«Коронавирус кэмигэр дьону ыкса сытыарар сатаммат. Онон түһэр сирдэр ахсааннарын элбэтэри ситиһиэхтээхпит”, — диир Андрей Тарасенко. Бырабыыталыстыба бэрэссэдээтэлэ Үөрэх министиэристибэтигэр сайыҥҥы сынньалаҥ лааҕырдарыгар оҕолору быстах кэмҥэ ылар пууннары тэрийэргэ сорудахтаата.

Дьоҥҥо мэдиссиинэ үлэһиттэрэ көмөлөһөллөр, психологическай өйөбүлү оҥороллор. Халааһын, бэрээдэги кэһии тахсыбатын туһугар бэһүөлэги эбии манааһын миэрэлэрэ ылыллыахтара.

«Саха сирэ» хаһыат, edersaas.ru

Хаартыска sakha.gov.ru

1
0