Бэс Күөлүн үөрэнээччилэригэр анаан үп-харчы хомуйуохтара

Ааптар: 
Бөлөххө киир:

Социальнай ситимнэргэ Бэс Күөлүн оскуолатын үөрэнээччилэригэр оскуола тээбириннэрин атыылаһыыга үп- харчы хомуйуу тэрилиннэ.

Харчыны хомуйууга ыҥырыыны Атамай нэһилиэгин землячествотын бэрэссэдээтэлэ Степанида Спиридоновна Пахомова тарҕаппыт.

Степанида Спиридоновна Атамай нэһилиэгин землячествотын өр кэмҥэ солбуллубат бэрэссэдээтэлэ уонна өрөспүүбүлүкэбит көхтөөх уопсастыбанньыга буолар. 

«Үтүө күн буолуохтун күндү доҕотторбут, билэр дьоммут уонна атын амарах сүрэхтээх дьоннор! Бары билэргит курдук, бу сайын Горнай оройуонун Бэс Күөлэ сэлиэнньэтигэр ойуур баһаарын содулугар хас да ыал дьиэтэ-уота суох хаалбытттара, үйэ-саас тухары муспут баайдара күл-күдэрик буолан көппүтэ. Хата дойдубут салалтата бэрт сыыдамнык туттунан, билигин умайбыт сири чөлүгэр түһэрии, дьиэни-уоту тутуу үлэтэ тэтимнээхтик бара турар. Олохтоохторго саҥа дьиэлэр тутуллаллар, ыалларга материальнай көмө харчы төлөннө. Ол эрээри, хомойуох иһин, ити харчы барытыгар тиийбэт. Баһаар содулугар эмсэҕэлээбит дьон иһигэр 27 үөрэнээччи баар. Кинилэр төрөппүттэрэ дьиэлэрин сөргүтүүгэ баар күүстэрин бырахпыттар, ол эрэн онноҕор оскуола тээбириннэрин атыылаһыыга кинилэргэ харчы тыырар уустук буолбут. Оттон балаҕан ыйа бу кэллэ эбээт. Онон бэйэм ааппыттан уонна Бэс Күөлэ олохтоохторун аатыттан биһиэхэ көмөҕө кэлэргитигэр ыҥырабын. Саҥа үөрэх дьылыгар бу оҕолору толору хааччыллыылаах киллэриэҕиҥ. Бу QR-код көмөтүнэн төһө кыайхатааххытынан үп ыытан үтүө дьалаҕа кыттыһыҥ.

Үп- харчы тыырыллыытын уонна оскуола табаардарын атыылаһааһын туһунан отчуоту бүүс- бүтүннүү социальнай ситимнэргэ угохпут. Убаастабылы кытта Степанида Спиридоновна Пахомова,

Атамай нэһилиэгин землячествотые бэрэссэдээтэлэ», — диэн иһитиннэриигэ суруллар.

Тэрийээччи этэринэн, дьон хайыы-үйэ көмөлөрүн ыытан барбыттар.

«Саха сирэ» хаһыат, edersaas.ru

Хаартыска sakha.gov.ru

+1
0
+1
0
+1
0
+1
0
+1
0
+1
0
+1
0