Маны аах Уопсастыба

Бэс Күөлүн олохтоохторугар РусГидро үлэһиттэрэ көмөлөстүлэр

«РусГидро» ПАУо үлэһиттэрэ Горнай улууһун Бэс Күөлүн олохтоохторугар ойуур баһаарыттан эмсэҕэлээбит сэлиэнньэни чөлүгэр түргэнник түһэрэргэ наадалаах үстүрүмүөннэри ылалларыгар көмөлөстүлэр.

Эрбиилэр атыылаһыллан нэһилиэккэ тиэрдилиннилэр. Маны таһынан, нэһилиэк дьаһалтатын көрдөһүүтүнэн олохтоохтор иһэр ууларын хаһааналларыгар анаан 250 л иһиттэр ылыллан бэрилиннилэр.

«РусГидро үлэһиттэригэр ис сүрэхпититтэн махтанабыт! Ойуур баһаарыттан эмсэҕэлээн дьон санаата улаханнык түспүт кэмигэр, үтүө санаалаахтар көмөлөһөннөр, санаалара арыый бэттэх кэлэн эрэр. Энергетиктэр көмөлөрө саамай тоҕоостоох кэмҥэ оҥоһулунна. Саҥа эрбиилэр дьиэни-уоту, хаһаайыстыбаҕа тутуулары тута охсорго улахан наадалаахтар. Кыһын да чугаһаан иһэр. Нэһилиэккэ дьиэлэр толору хааччыллыыта суохтар, онон иһэр ууну хаһаанарга аналлаах иһиттэр хайаатар да наадалар«, — диир нэһилиэк баһылыга Роман Федоров.
Санатан эттэххэ, ойуур уотуттан Бэс Күөлүгэр 180 киһи дьиэтэ-уота суох хаалбыта. Билиҥҥи туругунан Якутскэнерго энергетиктэрэ сэлиэнньэҕэ уот ситимин сүрүн үлэтин бүтэрдилэр. Ыйга тиийбэтинэн уот ситимин 33 тирэҕэ аҕалыллан туруорулунна. Энергетиктэр дьиэлэр тутуллан бүттэхтэринэ тута уокка холбуохтара.
0
0