Бэс Күөлүн олохтоохторугар кэнники тутуллубут саҥа дьиэлэр күлүүстэрэ бүгүн туттарылыннылар

СӨ Ил Дархана Айсен Николаев Инстаграмҥа страницатыгар Бэс Күөлүгэр бүгүҥҥү долгутуулаах күнүнэн санаатын үллэстэн суруйбут.

Бэс Күөлүгэр быйыл сайын атырдьах ыйын 7 күнүгэр ойуур баһаарыгар умайбыт дьиэлээхтэргэ анаан тутуллубут бүтэһик дьиэлэр күлүүстэрин бүгүн туттардыбыт.

Икки ыйтан ордук анараа кэмҥэ «Кэскил» түөлбэ күл-көмөр буолан, буруолуу сытара.  Ити күн, үөһээнэн барбыт ойуур уота нэһилиэккэ киирбитэ. Мин ол кэмҥэ олохтоохтору кытары онно баарым. Оттон атырдьах ыйын 8 күнүгэр, дьиэлэрин-уоттарын бу ойуур баһаарыгар былдьаппыт ыалларга көмөнү оҥорор туһунан дьаһалга илии баттаабытым. Онно СӨ Бырабыыталыстыбата кылгас кэм иһигэр эмсэҕэлээбит дьоҥҥо саҥа дьиэлэри тутуо диэн эрэннэрбитим.

Оттон билигин киһи көрөн олус үөрэр. Итэҕэйбэт дьон саарбаҕалаабыттарын да иһин, эрэннэриллибит толорулунна. Саҥа микрооройуону тутарга уон хампаанньа кытынна. Биһиги толору хааччыллыылаах дьиэлэри туттубут, наадалааҕынан тэрийдибит. Сэлиэнньэҕэ суол үлэтэ-хамнаһа ситтэ-хотто, дьиэлэргэ тэтимнээх интэриниэттэр киллэрилиннилэр, саҥа хотоннор тутулуннулар, ол иһигэр 100 төбөҕө пиэримэ тутулунна.

Сэлиэнньэни чөлүгэр түһэрии үлэтин бастакы күнүттэн өрөспүүбүлүкэ бүттүүнэ кыттыбыта. Олохтоохторго Саха сириттэн, өрөспүүбүлүкэ таһыттан волонтердар көмө-өйөбүл оҥоро кэлбиттэрэ. Бэйэлэрин баҕаларынан көмөлөһөр, өйөбүл буолар өрөспүүбүлүкэтээҕи ыстаап тэриллэн үлэлээбитэ. Саха сирин дьоно-сэргэтэ туора турбакка материальнай көмөнү оҥорбута. Бөдөҥ тэрилтэлэр көмөлөһөр баҕалаахтарын биллэрбиттэрэ. Биир бастакынан, 200 мөл.солк. үбүнэн «АЛРОСА» хампаанньа өйөбүлү оҥорбута. Бука барыгытыгар улахан махтал! Улахан махталбын наадалаах көмөнү, өйөбүлү оҥорбуттарыгар дойду Бэрэсидьиэнигэр Владимир Владимирович Путиҥҥа, РФ бэрэсидьиэнин Уһук Илин Федеральнай Уокурукка боломуочуйалаах бэрэстэбиитэлэ Юрий Петрович Трутневка тиэрдэбин!

Бэс Күөлүгэр, туох да омуна суох, саҥа олох саҕаланна. Саамай сүрүнэ — дьон сүрэҕэр-быарыгар уоскулаҥ уонна сарсыҥҥыга эрэл эргилиннэ. «Кэскил» — олох салҕаныыта, кэскиллээх буолуу. Бэс Күөлүн дьонун-сэргэтин олоҕо сырдык-ыраас, дьоллоох буоллун!