Бэс Күөлүн олохтоохторугар Арассыыйа Бырабыыталыстыбатыттан көмө көрүллүөҕэ
Ойуур баһаарын дьайыытыттан эмсэҕэлээбит Горнай улууһун Бэс Күөлүн сэлиэнньэтин олохтоохторо Арассыыйа Бырабыыталыстыбатыттан үп-харчы өттүнэн көмө ылыахтара. Бу туһунан дьаһалга дойду премьер-миниистирэ Михаил Мишустин илии баттаата.
«Баһаартан сылтаан олоҕо айгыраабыт дьоҥҥо 10 тыһыынча солкуобай биир кэмнээх материальнай көмө төлөнүөҕэ. Оттон дьиэлэрин-уотттарын толору сүтэрбиттэргэ хас биирдии ыал чилиэнигэр 100 тыһыынча солкуобай тиксэриллиэҕэ», — диэн Саха сирин баһылыга Айсен Николаев телеграм-ханаалыгар суруйда.
Өрөспүүбүлүкэ Бырабыыталыстыбата Арассыыйа Ыксаллаах быһыыга-майгыга министиэристибэтигэр харчынан көмөнү ылыыга наадыйар гражданнар испииһэктэрин биэрэргэ сорудаҕы ылла.
Дойду Бырабыыталыстыбатын резервнэй пуондатыттан бу кыһалҕаны быһаарыыга барыта 18 мөлүйүөн 150 тыһыынча солкуобай көрүллүөҕэ.