Горнай улууһун Бэс Күөлүгэр атырдьах ыйын саҥата ойуур баһаара киирэн, «Кэскил» учаастак дьиэлэрин имири сотон ааспыта. Тута кэриэтэ cаҥа дьиэлэри тутуу саҕаламмыта. Билигин саҥа 34 дьиэ көҥдөйө бүтэн турар. Бэҕэһээ, балаҕан ыйын 28 күнүгэр, Саввиннар дьиэлэрин үлэҕэ киллэрии тэрээһинэ ыытыллыбыта. Дьиэлэри тутууга олохтоохтор күүс-көмө буолаллар.
Дмитрий уонна Светлана Яковлевтар, Бэс Күөлүн олохтоохторо:
— Бу 70 кв. м иэннээх саҥа дьиэбит көҥдөйүн «Улей» ХЭУо уолаттара тутан бүтэрдилэр. Ис-тас үлэтин үмүрүтэллэрэ эрэ хаалла. Кинилэр үс дьиэни тута сылдьаллар. Уолаттар олус маладьыастар, барытыгар эппиэтинэстээхтик сыһыаннаһаллар, дьиэ хаачыстыбалаах буоларыгар ис сүрэхтэриттэн кыһаллаллар. Оннооҕор муоста кырааскатын өҥүн кытары таллардылар ээ, барахсаттар.
Дьиэ тутуутуттан тахсыбыт бөҕү-сыыһы ыраастаатыбыт, дьоҕус тыраахтарбыт прицебэр тиэйэ-тиэйэ хаста даҕаны кырынныбыт, барытын уолаттарга найылаабат буоллахпыт.
Түгэнинэн туһанан, бу ыарахан кэммитигэр күүс-көмө буолбут Ил Дархаммыт Айсен Николаевка, суһал ыстаап салайааччыта Дмитрий Бердниковка, улууспут баһылыга Никита Андреевка уонна Саха сирин амарах санаалаах дьонугар-сэргэтигэр ис сүрэхпититтэн махтанабыт.