Бэс Күөлүн олохтоохторо Саввиннар саҥа дьиэ күлүүһүн туттулар

Бөлөххө киир:

Горнай улууһун Бэс Күөлүгэр ойуур баһаарыттан эмсэҕэлээбит дьиэлэри чөлүгэр түһэрии үлэтэ күөстүү оргуйар. Ойуур баһаара имири сотон ааспыт сиригэр билигин 34 саҥа дьиэ көҥдөйдөрө дьэндэһэн тураллар. Адьас сабыс-саҥа учаастак баар буолбут. Ис-тас үлэлэрин оҥорон, итиини тутар билиитэлэри туруора сылдьаллар, муосталарын саайаллар.

34 дьиэттэн бүгүн бастакы дьиэ туох баар силигэ үмүрүтүллэн, хаһаайыттарга — Екатерина уонна Алексей Саввиннарга үөрүүлээх быһыыга-майгыга күлүүһү туттардылар. Саҥа дьиэни «Туймаада-Строй» ХЭУо тутта. Бу хампаанньа тустаах үлэни бастакынан саҕалаан, 10 дьиэни үлэҕэ киллэриэҕэ.


«Кэскил» кыбартаалга бастакы дьиэни киллэриигэ Ил Дархан Айсен Николаев: «Бастакы дьиэ үлэҕэ  киирбитинэн ис сүрэхпиттэн эҕэрдэлиибин. Алдьархай буолбутугар, бастаан утаа, бастакы сыбаайа түһэриллэр кэмигэр саҥа тутуулар дьэндэһиэхтэрэ диэн соччо итэҕэйбэт курдуктара. Ол эрээри, биир санаанан салайтаран, барыта этэҥҥэ буолан эрэр. Түгэнинэн туһанан, тутааччыларга, олохтоохторго, бары баар балаһыанньаны өйдөөн, күүскэ үлэлээн, баар кыһалҕаны туоратыыга үлэлии сылдьаргытыгар махталбын тиэрдэбин. Итини тэҥэ, бу дьиэлэри тутууга үп өттүнэн көмөлөспүт «АЛРОСА» уонна «Роснефть» хампаанньаларга махтанабын. Билигин үлэ хаамыытын көрөн баран, алтынньы 15 күнүгэр диэри бары дьиэ үмүрүтүллэригэр эрэнэбин», —  диэн эҕэрдэ тылын эттэ.


Дьиэлээхтэр ааттарыттан ыал  ийэтэ Екатерина Саввина: «Бу ыарахан кэммитигэр бары биир санаан кэлэн көмөлөһөн, олус үчүгэй дьиэни тутан үлэҕэ киллэрдигит. Ис сүрэхпиттэн РФ бэрэсидьиэнэ Владимир Путиҥҥа, Ил Дархан Айсен Николаевка, тутааччыларга, Саха сирин ытык-мааны олохтоохторугар дьиэ кэргэним аатыттан ис сүрэхпиттэн махтанабын!», — диэн махтанна.


Бу үөрүүлээх тэрээһиҥҥэ ыраахтан Өлөөн улууһун баһылыга Лена Иванова кэлэн: «Бэс Күөлүгэр ыарахан балаһыанньа буолбутугар, Саха сирин олохтоохторо бары көмөлөстүлэр. Бу дьиэлэри тутууга Өлөөнтөн төрүттээх 15 тутааччы үлэлээтэ. Түгэнинэн туһанан, Саввиннар дьиэ кэргэттэригэр холодильник бэлэхтиибит. 34 саҥа дьиэ хаһаайыттарыгар улууспут аатыттан холодильник бэлэх уунабыт. Саҥа дьиэҕит сылаас, сырдык буоллун, барыгытыгар доруобуйаны баҕарабын», — диэтэ.

Александр ТАРАСОВ, edersaas.ru

+1
0
+1
0
+1
0
+1
0
+1
0
+1
0
+1
0