Тыа хаһаайыстыбата

Бэс Күөлүн олохтоохторо сүөһүлэрин кыстаталларыгар 1025 туонна от наада

Горнай улууһун Бэс Күөлүгэр  ойуур баһаарын кэнниттэн «Кэскил» учаастагы  чөлүгэр түһэрии үлэтэ этэҥҥэ барар. Тыа хаһаайыстыбатын таарыйар буоллахха, 10 хотон тутулла турар. Мантан тоҕуһа кэтэх ыаллар киэннэрэ.

Ону тэҥэ, 100  төбөҕө аналлаах улахан хотон Алексей Петров салайааччылаах бааһынай хаһаайыстыбаҕа тутулла турар. Дьоҕус хотоннор үксүлэрэ тутуллан бүппүттэр. 100 төбө сүөһүгэ аналлаах улахан эбийиэк алтынньы 15 күнүн эргин үмүрүтүллүөхтээх. Сүрүн үлэтэ барыта бүтэн турар. Аналлаах матырыйааллары барытын аҕалбыттар. Ититэр уонна уот ситимнэрин тардыы барар.

СӨ тыатын хаһаайыстыбатын миниистирэ   Александр Атласов: “Бэс Күөлүн олохтоохторо сүөһүлэрин, сылгыларын кыстаталларыгар отторо суох. Ону хааччыйарга сөптөөх үлэ барар. Билиҥҥи туругунан, 40 туонна оту тиэйэн аҕалбыппыт. Сылы кыстыырга барыта 1025 туонна от  наада.  360 туоннаны Забайкалье кыраайыттан аҕалыахпыт, кимнээх тиэйиэхтээхтэрэ, хаһан аҕалыахтаахтара  быһаарыллыбыта. Бу күннэргэ таһан саҕалыахтара. От сорох чааһын Бүлүү, Үөһээ Бүлүү улуустарыттан аҕалыахпыт. Кыһыҥҥы суол туруор диэри Бүлүү бөлөх улуустартан 400-чэкэ туоннаны  аҕаларга былааннаатыбыт, хаалбытын эһиил кыһыҥҥы суол аһылыннаҕына, быһаарыахпыт.

Итини тэҥэ, ойуур баһаарыгар сүөһүлэр, кууруссалар, куруолуктар, сибиинньилэр былдьаммыттара. Билигин дьоҕус хотоннор тутуллан бүппүттэринэн сибээстээн, сүөһүлэри аҕалыахпыт. Маны быһаарыыга эппиэтинэстээх тэрилтэнэн «Сахаагроплемхолбоһук» ГБУ буолар», — диэн быһааран биэрдэ.

 

 

0
0