Сүрүн Уопсастыба

Бэс Күөлүн олохтоохторо махтаналлар

Бүгүн Горнай улууһун Бэс Күөлүгэр 34 саҥа дьиэни үмүрүтэн, этэргэ дылы, бүтэһик туочука туруорулунна. Олохтоохтор үөрүүлэрэ уонна махталлара муҥура суох.

Светлана уонна Дмитрий Яковлевтар, биэнсийэлээхтэр:
— 70 кв. м иэннээх, толору хааччыллыылаах дьиэни тутан үлэҕэ киллэрбиттэриттэн олус диэн үөрдүбүт. Билигин 200 тыһ. солк. биэрбиттэринэн миэбэл сакаастаары сылдьабыт. Өлөөн улууһун дьаһалтата хас биирдии саҥа дьиэҕэ холодильник ыыппыттарын ааспыкка аҕалан биэрбиттэрин бу холбоотубут. Дьиэбит сылаас, сып-сырдык, сабыс-саҥа. «Улей» ХЭУо уолаттара сыа-сым курдук тутан кэбистилэр. Уокка былдьаммыт дьиэбит 1990 сыллааҕы тутуу этэ.

Түгэнинэн туһанан Ил Дархан Айсен Николаевка, СӨ Бырабыыталыстыбатын бэрэссэдээтэлин 1-кы солбуйааччы Дмитрий Бердниковка, тутааччыларга уонна Саха сирин олохтооругар ис сүрэхпититтэн барҕа махталбытын тиэрдэбит. Дьонноох киһи тутайбат диэн маны этэн эрдэхтэрэ, дьонноох-сэргэлээх, үчүгэй салалталаах буоламмыт ыарахан кэми мүччү түһэн, барыта этэҥҥэ буолла.

Анатолий уонна Мотрена Аввакумовтар, биэнсийэлээхтэр:
— 100 кв. м иэннээх дьиэбитин хаачыстыбалаахтык тутан бүтэрдилэр. Харахпыт далыгар тутулунна, хайдах-туох оҥороллорун көрө сырыттыбыт. Сотору миэбэлбитин атыылаһан аҕалан таҥан туруоруохпут. Оҕолорбут барахсаттар эрдэ остуолбутун эҥин атыылаһан аҕалан биэрбиттэрэ.
Бүгүн аммалар микроволновка ыыппыттарын аҕалан биэрдилэр. Аны өлөөннөр холодильник ыыппыттарын туһанан абыранныбыт. Бэйэбит үөр сылгылаахпытын иитэбит. Аҕыс оҕолоохпут, бары ыаллар, 20 сиэннээхпит. Кыстыгы баттаһа саҥа дьиэҕэ киирэр дьолломмуппутунан сүргэбит олус көтөҕүлүннэ.

Ыарахан кэммитигэр күүс-көмө буолбут Ил Дархан Айсен Николаевка, СӨ Бырабыыталыстыбатын салалтатыгар, улууспут баһылыга Никита Андреевка, нэһилиэкпит баһылыга Роман Федоровка, дьиэбитин туппут «Туймаада-строй» ХЭУо дириэктэрэ Андрей Даниловка, тутааччыларга уонна Саха сирин ытык-мааны олохтоохторугар ис сүрэхпититтэн махталбытын тиэрдэбит. Үтүө, амарах санааҕыт, өйөбүлгүт уон оччонон бэйэҕитигэр эргилиннин, дьиэ кэргэҥҥитигэр дьолу-соргуну, тус олоххутугар ситиһиини, кытаанах доруобуйаны баҕарабыт!

Александр Тарасов, «Саха сирэ» хаһыат

1
0