Быйыл сайын Горнай улууһун Бэс Күөлүгэр хочуолунайы улахан уоттан соҕотоҕун быыһаабыт Спиридон Сергеевич Яковлев «Баһаарга хорсун быһыытын иһин» мэтээлинэн наҕараадаланна.
edersaas.ru
СӨ Ил Дархана Айсен Николаев атырдьах ыйын 31 күнүгэр этиитигэр Саха сиригэр баһаарга кыттыбыт хас биирдии киһинэн киэн туттарын туһунан эппитэ.
«Уот алдьархайын утары охсуспуттар бары Саха Өрөспүүбүлүкэтигэр баһаары умулларыыга кыттыбыттарын иһин анал бэлиэнэн наҕараадаланыахтара. Кинилэр бар дьоннорун ытыктабылын уонна махталын ылаллар. Кинилэр биир дойдулаахтарын, сэлиэнньэлэри уонна ойууру уоттан быыһыыр туһугар дьиҥнээх дьоруойдуу быһыыны көрдөрдүлэр», -– диэбитэ уонна бүгүҥҥү эдэр дьоруойбут Спиридон Яковлев хорсун быһыытын холобурдаабыта.
Спиридон Яковлев — «СӨ Дьиэ-уот, коммунальнай хаһаайыстыбата» судаарыстыбаннай унитарнай тэрилтэ Горнайдааҕы салаатын производственнай учаастагын маастара, «Сахамедиа» холдинг тэрийэр «Саха сирин киэн туттуута» бүтүн норуот бириэмийэтин «Подвиг-2021» номинациятын финалиһа.
Быйыл атырдьах ыйын 7 күнүгэр Горнай улууһун Бэс Күөлүн алдьархайдаах баһаарын кэмигэр тыал олус күүһүрэн, үөһээнэн барбыт уот минерализованнай балаһа нөҥүө олорор дьиэлэргэ, хаһаайыстыбаннай тутууларга ыстаммыта. Бу кэмҥэ уот олорор дьиэлэри, гараастары, хаһаайыстыбаннай тутуулары салаан барбыта. Онуоха учаастак маастара Спиридон Сергеевич нэһилиэк хочуолунайын уот алдьатыылаах күүһүттэн быыһыырга соҕотоҕун туруммута. Кини кылаабынай инженергэ төлөпүөнүнэн эрийэ охсон, уот олорор дьиэлэргэ чугаһаан эрэрин туһунан иһитиннэрбитэ. Салайааччыттан ыйыы-кэрдии ылан баран, дизель-генератор ыстаансыйатын холбообута, баһаарынай-рукавалары бэлэмнээбитэ, носуостары үлэлэппитэ. Чаас аҥаарынан уот успуорт саалатын хочуолунайыгар чугаһаабыта уонна бу эбийиэктэн 20 миэтэрэ тутар хаһаайыстыбаннай тутуулары былдьыыр кутталламмыта.
Онуоха хорсун уол бэйэтин олоҕун былдьатар кутталын аахсыбакка, хочуолунай таһыгар умайар көрдүгэннэри умулларан барбыта. Ол түмүгэр уот кытыастар кыыма хочуолунайга уонна оттуктаах резервуарга ыстанарыттан быыһаабыта, уот тарҕанар кутталын суох оҥорбута.
40 мүнүүтэнэн киниэхэ Бэрдьигэстээхтэн саахалы чөлүгэр түһэрэр биригээдэ бэһис разрядтаах сыбаарсыга, ойуур баһаарын умулларарга элбэхтик үлэлээбит Егор Петров көмөҕө кэлбитэ. Онон иккиэн суһал уонна сөптөөх дьайыыларынан, хаалбыт көрдүгэннэри умулларбыттара уонна уот тарҕанарын бопсубуттара.
Спиридон Яковлев (бар дьоно кинини Спира диэн таптаан ааттыыллар) бу тэрилтэтигэр 2015 сылтан үлэлиир. Биир идэлээхтэрин кытары Горнай улууһугар ойуур баһаарын умулларарга күнү-түүнү аахсыбакка үлэлээтилэр. Эдэр маастар салалтатынан учаастакка 13 киһи үлэлиир.
«Ыксаллаах кэмҥэ тугу оҥоруохтаахпар мунаахсыйбатаҕым, барытын инструкция быһыытынан оҥорбутум. Егор Петровка уонна Бэрдьигэстээхтээҕи биир идэлээхтэрбитигэр махтанабын», -– диэн бүгүҥҥү эдэр дьоруойбут олус сэмэйдик этэр.
Надежда ЕГОРОВА, «Саха сирэ», edersaas.ru