Горнай улууһун Бэс Күөлүгэр ойуур баһаарыттан эмсэҕэлээбит дьиэлэри чөлүгэр түһэрии үлэтэ биэтэккэ лаппа чугаһаата. Ааспыт нэдиэлэҕэ 20 саҥа дьиэ хаһаайыттара күлүүстэри туппуттара.
Санатар буоллахха, атырдьах ыйын 28 күнүгэр бастакынан Екатерина уонна Алексей Саввиннар дьиэ күлүүһүн үөрүүлээх быһыыга-майгыга туппуттара. Үтүө тэрээһиҥҥэ Ил Дархан Айсен Николаев кыттыбыта.
Ол бастакы үөрүүлээх тэрээһиҥҥэ ыраахтан Өлөөн улууһун баһылыга Лена Иванова кэлэн, «Бэс Күөлүгэр ыарахан балаһыанньа буолбутугар, Саха сирин олохтоохторо бары көмөлөстүлэр. Бу дьиэлэри тутууга Өлөөнтөн төрүттээх 15 тутааччы үлэлээтэ. Түгэнинэн туһанан, 34 саҥа дьиэ хаһаайыттарыгар улууспут аатыттан холодильник бэлэх уунабыт. Саҥа дьиэлэр сылаас, сырдык буоллуннар, барыгытыгар доруобуйаны баҕарабын», — диэн эҕэрдэлээбитэ уонна хас биирдии дьиэ хаһаайыттарыгар анаан-минээн хоту улуус олохтоохторун аатыттан холодильник биэрэллэрин туһунан иһитиннэрбитэ.
Бу күннэргэ холодильниктары анаан-минээн аҕалан, хас биирдии дьиэ хаһаайыттарыгар туттардылар. Бэс Күөлүн баһылыга Роман Федоров: «Бу күннэргэ «Кэскил» түөлбэ 34 саҥа дьиэтин хаһаайыттарыгар холодильниктары аҕалан биэрбиттэрэ. Олохтоохтор үөрүүлэрэ муҥура суох. Түгэнинэн туһанан, Бэс Күөлүн олохтоохторун аатыттан Өлөөн улууһун ытык-мааны олохтоохторугар ис-сүрэхпиттэн махталбын тиэрдэбин. Үтүө санааҕыт уон оччонон бэйэҕитигэр төннөн кэллин, бары үчүгэйи баҕарабын!», — диэн иһитиннэрдэ.