Ойуур баһаарыттан эмсэҕэлээбит Горнай улууһун Бэс Күөлүгэр саҥа хотон тутуллан бүттэ.
Сүүрбэ сүөһү тутарыгар анаммыт хотону «Дьокуускайдааҕы көтөрү иитэр фабрика» АУо тутта диэн «Якутия Daily» иһитиннэрэр.
Тэрилтэ генеральнай дириэктэрэ Наталия Дягилева ойуур баһаарыттан эмсэҕэлээбит тыа хаһаайыстыбатын бородууксуйатын оҥорон таһаарааччыларыгар көмө буоларын иһитиннэрэр.
Көтөрү иитэр фабрика үлэһиттэриттэн алта киһилээх биригээдэ тэриллэн, үлэлэрин балаҕан ыйын 2 күнүттэн саҕалаабыттар. Ол түмүгэр, нэдиэлэттэн ордук кэм иһигэр саҥа хотон тутуллан, хороҕор муостаахтар киирэллэригэр номнуо бэлэм.
Тутуу матырыйаалларын фермердэр биэрбиттэр. Саҥа хотон хаһаайыннарынан буолбут хаһаайыстыба баһылыгын уола Эрчим Максимов баһаар кэмигэр быыһаммыт сүөһүлэрин ахсаанын нэһилиэк олохтоохторо аҕыйаппакка иитэргэ бигэ эрэллэммиттэрин иһитиннэрэр. Онуоха саҥа хотонноммуттара санааларын бөҕөргөппүт. Оттон отторугар Тыа хаһаайыстыбатын министиэристибэтэ туспа бырагыраама суотугар көмөлөһүөхтээх.
Дьокуускайдааҕы көтөрү иитэр фабрика салалтата бу хаһаайыстыбаҕа көмөлөһөн биэс кууруссаны биэрбит.
+1
+1
+1
+1
+1
+1
+1