Бэс Күөлүгэр саҥа дьиэлэр күлүүстэрин хаһаайыттарга туттардылар
03.10.2021
Горнай улууһун Бэс Күөлүгэр ойуур баһаарыгар былдьаммыт дьиэлэр оннуларыгар саҥа дьиэлэри тутуу үлэтэ тиһиктээхтик салҕанар.
СӨ Бырабыыталыстыбатын бэрэссэдээтэлин бастакы солбуйааччы Дмитрий Бердников бэҕэһээ, алтынньы 2 күнүгэр, саҥа тутуллан бүппүт алта дьиэ күлүүһүн хаһаайыттарга туттарбыт. Кини нэһилиэккэ чөлүгэр түһэрии үлэлэрэ кыраапык быһыытынан тиһиктээхтик салҕанан иһэллэрин, дьиэни-уоту тутуу үлэтэ алтынньы 15 күнүгэр түмүктэниэхтээҕин бэлиэтээбитин туһунан sakha.gov.ru иһитиннэрэр.
«Олус долгутуулаах түгэн. Нэһилиэккэ чөлүгэр түһэриигэ үлэлээбит дьоҥҥо барыларыгар махтанабын», — диир нэһилиэк олохтооҕо Светлана Яковлева.
Санатан эттэххэ, СӨ Ил Дархана Айсен Николаев саҥа тутуллубут бастакы дьиэ күлүүһүн Саввинар дьиэ кэргэҥҥэ туттарбыта.
+1
+1
+1
+1
+1
+1
+1