Бэс Күөлүгэр кэлэр нэдиэлэттэн дьиэлэри тутан саҕалыахтарын сөп

Ааптар: 
Бөлөххө киир:

Бэс Күөлүгэр дьиэлэри кэлэр нэдиэлэттэн тутан саҕалыахтарын сөп диэн бүгүн Ил Дархан Айсен Николаев Уһук Илиҥҥэ РФ Бэрэсидьиэнин боломуочуйалаах бэрэстэбиитэлэ Юрий Трутнев сырыытын түмүктүүр мунньаҕар иһитиннэрдэ.

Санатан суруйдахха, атырдьах ыйын 7 күнүгэр Горнай улууһун Бэс Күөлүгэр ойуур баһаарыттан 40 дьиэ, 15 гараас, 24 баанньык уонна атын тутуулар уокка былдьаммыттара.

Билиҥҥитэ нэһилиэккэ чөлүгэр түһэрии үлэтэ бара турар. Саҥа дьиэлэри алтынньы ортотугар диэри тутан бүтэриэхтээхтэр. Онон тутуу үлэтэ кэлэр нэдиэлэттэн саҕаланыан сөп.

«Юрий Петровичтыын Бэс Күөлүгэр сырыттыбыт. Кини нэһилиэккэ ойуур баһаарыттан эмсэҕэлээбит сиргэ-уокка туох үлэ бара турарын көрдө. Онно билигин былаанныыр, сири ыраастыыр үлэ ыытыллар. Онон кэлэр нэдиэлэттэн тутуу үлэтэ саҕаланыаҕар эрэнэбит», — диэн Айсен Николаев этэр.

Ил Дархан этэринэн, саҥа дьиэлэри тутууга 250 мөлүйүөн солкуобай ирдэнэр. Онтон 200 мөлүйүөн солкуобайын АЛРОСА хампаанньа Үүнэр көлүөнэ пуондатын нөҥүө ыытыаҕа.

Уоттан дьиэлэрэ-уоттара эмсэҕэлээбит дьон дьиэлэрин иһин-таһын оҥостоллоругар, миэбэл, дьиэ тиэхиньикэтин ылыналларыгар Арассыыйа ЫБММ харчы көрүөхтээх. Тустаах докумуоннар миниистир Евгений Зиничевкэ тиэрдибиттэрэ.

175 киһиэхэ өрөспүүбүлүкэ бүддьүөтүттэн 30-туу тыһыынча солкуобай көрүллүбүтэ. Бэҕэһээ биллибитинэн, федеральнай бүддьүөттэн 100-түү тыһыынча солкуобай эбии көрүллүөҕэ.

Ил Дархан уонна Бырабыыталыстыба дьаһалтатын пресс-сулууспата.

Андрей Сорокин хаартыската.

+1
0
+1
0
+1
0
+1
0
+1
0
+1
0
+1
0