Горнай улууһун Бэс Күөлүгэр баһаартан эмсэҕэлээбит олорор дьиэҕэ-уокка инвентардааһын үлэтэ ыытылла сылдьар.
Бу үлэни Баайга-дуолга уонна сиргэ сыһыаннаһыы министиэристибэтин исписэлиистэрэ Горнай улууһун Баайга-дуолга уонна сиргэ сыһыаннаһыы муниципальнай хаһыанай тэрилтэтин итиэннэ «Техническэй учуот уонна техническэй инвентаризация өрөспүүбүлүкэтээҕи киинэ» судаарыстыба унитарнай тэрилтэтин кытары бииргэ толороллор. Инвентардааһын түмүгүнэн, 32 олорор дьиэ, ол иһигэр 26 чааһынай дьиэ уонна алта элбэх (16) кыбартыыралаах олорор дьиэ эмсэҕэлээбитэ чуолкайдаммыта. Билигин нэһилиэк сиригэр-уотугар баһаартан эмсэҕэлээбит сайылык хаһаайыстыбаларын инвентардааһын ыытыллар. Инвертардааһын түмүгүнэн, 41 техническэй көрүү аактата оҥоһуллан, эмсэҕэлээбит гражданнарынан илии баттанна. Маны таһынан, «Техническэй учуот уонна техническэй инвентаризация өрөспүүбүлүкэтээҕи киинэ» СУТ исписэлиистэрэ атырдьах ыйын 10 күнүттэн Бэс Күөлүн топографическай былаанын оҥороллор, нэһилиэнньэлээх пуун кыраныыссатын чопчулууллар. Бу туһунан Баайга-дуолга уонна сиргэ сыһыаннаһыы министиэристибэтин пресс-сулууспата иһитиннэрэр.
Раиса Сибирякова, «Саха сирэ», edersaas.ru