Сүрүн Уопсастыба

Бэс Күөлүгэр эбии 14 дьиэ үлэҕэ киирдэ

Горнай улууһун Бэс Күөлүгэр ойуур баһаарыттан эмсэҕэлээбит «Кэскил» учаастагы чөлүгэр түһэрии үлэтэ этэҥҥэ барар.

Балаҕан ыйын 28 уонна алтыннньы 1 күннэригэр уопсайа алта саҥа дьиэни олохтоохторго туттарбыттара. Бүгүн икки чаастан 14 дьиэни үлэҕэ киллэрэр үөрүүлээх тэрээһин буолла.

Горнай улууһун баһылыга Никита Андреев тутааччыларга махтанар

Эҕэрдэ тылы СӨ Бырабыыталыстыбатын бэрэссэдээтэлин 1 солбуйааччы, Бэс Күөлүгэр ойуур баһаарыттан эмсэҕэлээбит «Кэскил» учаастагы чөлүгэр түһэриигэ хамыыһыйа салайааччыта Владимир Бердников: «Барыгытын бу үтүө тэрээһининэн эҕэрдэлиибин. Тутааччылар бэркэ ис сүрэхтэриттэн үлэлии сылдьаллар. Аҕыйах кэм иһигэр толору хааччыллыылаах дьиэлэри үмүрүтэн эрэллэр. Кэлэр нэдиэлэ бүтүүтүн эргин хаалбыт дьиэлэри барыларын үлэҕэ киллэриэхпит», — диэтэ.

Наталья уонна Иван Максимовтарга, Афанасий Максимовка, Анна Винокуроваҕа, Агафья Ковроваҕа, Андрей Яковлевка, Диана уонна Леонид Федоровтарга, Ольга Жирковаҕа, Андрей Ивановка, Галина уонна Кирилл Ивановтарга, Людмила Варламоваҕа, Римма Аввакумоваҕа, Никон Аввакумовка, Любовь Варламоваҕа, Юлия уонна Анатолий Аввакумовтарга саҥа дьиэ күлүүстэрин үөрүүлээх быһыы-майгы ортотугар туттардылар.


Эҕэрдэ тылларын Ил Түмэн бэрэссэдээтэлин солбуйааччы Антонина Григорьева, СӨ Тутууга миниистирэ Павел Кылатчанов, Кэлэр көлүөнэ тус сыаллаах пуондатын генеральнай дириэктэрэ Владимир Егоров, Горнай улууһун баһылыга Никита Андреев эттилэр.

 

Олохтоохтор ааттарыттан Диана Федорова махтал тыллары эттэ:

—Ил Дархан Айсен Николаевка, тутааччыларга олохтоохтор ааттарыттан махтал тылларын тиэрдэбит. Ама да ааспытын иһин, икки ый анараа өттүгэр ыарахан кэмнэр бүрүүкээбиттэрэ. Ойуурдаах куобах охтубат дииллэрэ чахчы эбит. Сөптөөх үлэ, көмө ыытыллан, кыһын буолуон иннинэ дьиэлэнэр буоллубут диэн олус үөрдүбүт. Өссө төгүл улахан махтал!

Александр Тарасов, «Саха сирэ» хаһыат, edersaas.ru

0
0