Уопсастыба

Бэс Күөлүгэр дьиэни-уоту тымныылар түһүөхтэригэр диэри бүтэрэр сорук турар

Бүгүн, атырдьах ыйын 31 күнүгэр, «Саха» НКИХ, «Якутия24» телеханаалынан уонна «Тэтим» араадьыйаҕа СӨ Ил Дархана  Айсен Николаев Саха сирин олохтоохторугар туһаайан тыл эттэ.

Бастатан туран, кини сайыны быһа ойуур баһаардарын утары хорсуннук-хоодуоттук охсуспут баһаарынайдарга, күннэри-түүннэри сылайары аахсыбакка уоту умулларар туһугар сыраласпыт дьоҥҥо махтанна. Хас биирдиилэрин ааттаан туран, наҕараадаларга түһэрбитин туһунан иһитиннэрдэ.

—Тыһыынчанан киһи сомоҕолосто. Бары сарын-сарыннарыттан өйөһөн, бэйэ-бэйэҕэ тирэх буолан ыараханы этэҥҥэ туораатыбыт, — диэтэ кини. Кыайыы улахан сыранан, күүһүнэн кэлбитин эттэ.

Ил Дархан, маны сэргэ, Горнай улууһугар ойуур уотуттан эмсэҕэлээбит Бэс Күөлүгэр ыытыллар үлэлэр тустарынан эттэ. Ол курдук, атырдьах ыйын 20 күнүттэн олорор дьиэлэри тутуу үлэтэ саҕаламмыт. Дьиэлэр тымныылар түһүөхтэригэр диэри ситэриллэн-хоторуллан хаһаайыттарга туттарыллыахтаахтар диэтэ. Маны сэргэ, кини Бэс Күөлүгэр ойуур уотуттан эмсэҕэлээбит олохтоохтор төлөбүр ылыахтарын туһунан иһитиннэрдэ. Тыа хаһаайыстыбатын тутууларыттан уонна тиэхиньикэлэриттэн мэлийбит дьоҥҥо бырабыыталыстыба 60 мөл.солк. көмөҕө анаан ыыппытын, үлэлиир сирдэриттэн ытыстарын соттон хаалбыт урбаанньыттар компенсация ылыахтарын туһунан эттэ.

0
0