Бэс Күөлүгэр дьиэни тутууга үлэлээбиттэргэ хамнастара хайаан да төлөнүөҕэ

Горнай улууһун Бэс Күөлүгэр  «Кэскил”  учаастакка 34 саҥа дьиэни тутуу  ааспыт нэдиэлэҕэ үмүрүтүллүбүтэ. Ол эрээри,  батсаап ситиминэн  тутааччыларга хамнаһы төлүү иликтэрин туһунан  иһитиннэрии тарҕанан дьону соһутта.

Ол курдук, «Аурис» тэрилтэ үлэһиттэрэ хамнастарын ыла иликтэр диэн буолбута. Ол эрээри, СӨ Тутууга министиэристибэтэ хамнас төлөнөрүн туһунан иһитиннэрдэ.  Тустаах тэрилтэ үс дьиэни туппутуттан иккитигэр  анал акт оҥоһуллан,  сөптөөх төлөбүр хампаанньа счетугар  барбыт. Оттон үһүс дьиэ  докумуоннарын ыыта иликтэр эбит. Ол курдук, тэрилтэ салайааччыта бэҕэһээ, алтынньы 25 күнүгэр, балыыһаттан саҥа тахсыбыт, онон боппуруос бу күннэргэ быһаарыллыаҕа диэн иһитиннэрдилэр.