Горнайга Бэс Күөлүгэр саҥа оскуоланы тутуу үлэтэ быйылгытан саҕаланыахтаах.
Ааспыт сайын ойуур баһаара Бэс Күөлүгэр улахан хоромньуну оҥорбута. Маныаха СӨ Ил Дархана Айсен Николаев улахан болҕомтотун чөлүгэр түһэрии үлэтигэр уурбута. Саҥа дьиэлэри, социальнай, хаһаайыстыбаннай эбийиэктэри тутуу күргүөмнээхтик саҕаламмыта. Маны сэргэ, быйыл 150 миэстэлээх саҥа оскуоланы тутуу үлэтэ саҕаланыа.
Бу туһунан куйаар ситиминэн Горнай улууһугар ыытыллыбыт СӨ Бырабыыталыстыбатын ааспыт сыллааҕы үлэтин отчуотугар бастакы вице-премьер Дмитрий Бердников иһитиннэрбит. Саҥа оскуола тутуутугар федеральнай бүддьүөттэн үп көрүллүбүтүн эппит.
Маны сэргэ, 2021 сылга олорор дьиэни-уоту уонна эбийиэктэри тутуу туһунан улуус олохтоохторугар өссө төгүл сырдатыллыбыт. Ол курдук, «Манчаары оонньуулара» спартакиада чэрчитинэн, Бэрдьигэстээххэ былырыын элбэх хайысхалаах успуорт саалата, 1000 миэстэлээх стадион, 50 миэстэлээх интэринээттээх сыал ытар комплекс тутуллубуттара.
Ааспыт сылга улууска уопсайа 5659,9 кв. м. иэннээх 65 кэтэх дьиэ тутуллубут. Итини таһынан, хаарбах дьиэттэн саҥаҕа көһөрүү бырагырааматынан элбэх кыбартыыралаах икки дьиэ Бэрдьигэстээххэ «Сэргэлээх» түөлбэҕэ киирбит. Ол түмүгэр хаарбахтан саҥаҕа 425 киһи көспүт.
Андрей Сорокин (СИА) хаартыскаҕа түһэриитэ.
+1
+1
+1
+1
+1
+1
+1