Уопсастыба

Бэс Күөлүгэр бүтэһик туочука туруорулунна

Бүгүн, алтынньы 18 күнүгэр, Горнай улууһун Бэс Күөлүгэр ойуур баһаарыттан эмсэҕэлээбит «Кэскил» түөлбэни чөлүгэр түһэриигэ түмүктүүр туочука туруорулунна.

Ол курдук, эбии 14 саҥа дьиэ күлүүһүн хаһаайыттарга үөрүүлээх, сүргэ көтөҕүллүүлээх тэрээһиҥҥэ туттартаатылар. Эҕэрдэ тылы СӨ Бырабыыталыстыбатын бэрэссэдээтэлин 1-кы солбуйааччы, Бэс Күөлүгэр ойуур баһаарыттан эмсэҕэлээбит «Кэскил» учаастагы чөлүгэр түһэриигэ хамыыһыйа салайааччыта Дмитрий Бердников эттэ.

«Барыгытын бу үтүө тэрээһининэн эҕэрдэлиибин. Тутааччылар, өрөспүүбүлүкэ салалтата, олохтоохтор уонна өрөспүүбүлүкэ дьоно бары биир санаанан салайтаран, аҕыйах кэм иһигэр толору хааччыллыылаах дьиэлэри үмүрүттүбүт. Ааспыт сайын алдьархайа умнуллуохтаах, саҥа олох саҕаланыахтаах. Өссө төгүл барыгытын ис сүрэхпиттэн эҕэрдэлиибин!» — диэтэ уонна 14 ыалга саҥа дьиэлэр күлүүстэрин туттартаата. Салгыы «Кэскил» түөлбэни чөлүгэр түһэриигэ таһаарыылаахтык үлэлээбит тутааччыларга Ил Дархан грамоталарын, судаарыстыбаннай наҕараадалары олохтоохтор ытыстары тыаһын, уруйдуур-айхаллыыр хаһыыларын ортотугар туттартаата.
Салгыы Алексей Петров бааһынай хаһаайыстыбатыгар 100 миэстэлээх саҥа хотону үлэҕэ киллэрэр тэрээһин буолла. Саҥа хотон механизированнай. Ол аата ынах ноһуомун анал тэрил таһырдьа таһаарар. Ынахтары ыыр анал систиэмэлээх, үүтү сойутарга аналлаах тэриллээх, куукуналаах, дууштанар сирдээх. Онон таһаарыылаах үлэҕэ усулуобуйа тэриллибит. Кэлин үүт блогар анал тэрили ылан, үүт аһы дэлэйдик астыыр кыахтаахтар.

Бэс Күөлүгэр үлэ манан түмүктэммэт. РФ Бэрэсидьиэнэ Владимир Путин эһиил нэһилиэккэ социальнай эбийиэктэр тутуллуохтаахтарын туһунан сорудахтаабыта. Бу чэрчитинэн сөптөөх үлэ ыытыллара күүтүллэр.

Александр Тарасов, «Саха сирэ» хаһыат, edersaas.ru

 

1
0