Горнайга Бэс Күөлүгэр 150 миэстэҕэ суоттанан тутуллар оскуола саҥа миэбэлинэн, үөрэтэр-лабораторнай тэрилинэн, компьютердарынан, интерактивнай дуоскаларынан хааччыллыа. Бырайыагынан бу доруобуйаларыгар хааччахтаах дьон сылдьалларыгар табыгастаах буоларын курдук көрүллэн оҥоһуллуохтаах.
Ааспыт сайын ойуур баһаарыттан эмсэҕэлээбит Бэс Күөлүн оҕолоро билигин 1982 сыллаахха тутуллубут мас дьиэҕэ үөрэнэ олороллор. Бу кыһалҕаны туоратар туһуттан, манна федеральнай үп-харчы суотугар, аныгы кэм ирдэбилигэр толору эппиэттиир икки мэндиэмэннээх таас оскуола тутуллар.
«Билигин үөрэнэр оскуолабыт эргэ, кыһын манна тымныы. Сылаас, саҥа кыһа тутулларын наһаа кэтэһэбит, толору хааччыллыылаах буолуон баҕарабыт«, — диэн орто оскуола дириэктэрэ Мотрена Ефремова этэр. Билигин оскуолаҕа 134 оҕо үөрэнэр. Ааспыт күһүн бастакы кылааска 12 оҕо киирбит.
«Бэс Күөлүн оҕолоругар үрдүк билиини-көрүүнү биэрэргэ усулуобуйа наада. Манна саҥа оскуола тутуллара барыбыт эппиэтинэспит. Тутуу хаачыстыбалаах буолара уонна кыраапык быһыытынан толоруллара наада«, — диэтэ СӨ Ил Дархана Айсен Николаев.
Саҥа оскуоланы тутуу быйылгыттан саҕаланар. Ахсынньыга СӨ судаарыстыбаннай сакааһын сулууспата «Стройтехпроект» ХЭУо кытта бырайыактыыр-сметнай докумуону оҥорорго дуогабар түһэрсибит. Үлэ түмүктэммитин кэнниттэн докумуон судаарыстыбаннай эспэртиисэҕэ ыыталлар. Этэҥҥэ буоллаҕына, салгыы тутар-монтажтыыр үлэҕэ аукцион биллэриллэр.
Хаартыска: СИА