Маны аах Тыа хаһаайыстыбата

Бэс Күөлүгэр 100 сүөһү турар комплескын үлэҕи киллэрдилэр

Бүгүн Горнай оройуонун Бэс Күөлүгэр 100 төбө сүөһү турар саҥа комплексын үөрүүлээхтик астылар. Бу Алексей Петров «Атамай» бааһынай хаһаайыстыбата ойуур баһаарыгар сүтэрбит хотонун оннугар тутулунна.

edersaas.ru

Үөрүүлээх аһыллыыга СӨ Бырабыыталыстыбатын бэрэссэдээтэлин бастакы солбуйааччы Дмитрий Бердников тыл эттэ, сүөһү турар комплексын чөлүгэр түһэриигэ кыттыбыт дьоҥҥо махталын биллэрдэ.

Тыа хаһаайыстыбатын миниистирэ Александр Атласов олохтоохторго эҕэрдэтин тиэртэ. 

«Атамай» КФХ саҥа комплексын бэлиэ буолар күлүүһнү Алексей Петровка «Ханалас тутуу» бэдэрээччит тэрилтэтин генеральнай дириэктэрэ Кан Терешкин туттарда.

Тыһыынчаттан тахса кв.м иэннээх саҥа комплекска турар сүөһү сылы эргиччи ыаныан сөп. Саҥа тутуу үүт блогунан уонна модульнай хочуолунайынан хааччылынна, автопоилкаларынан, аныгы долборук, күрдьэр систиэмэнэн толору. Аныгы тэриллэрдэммит бааһынай хаһаайыстыба саҥа хотоно сылга 300 тонна үүтү оҥорон таһаарыыга суоттаммыт.

Санатан эттэххэ, ойуур баһаарыттан бу сиргэ 26 хаһаайыстыба дьиэтэ-уота, оттуур ходуһата эмсэҕэлээбитэ.

100 төбө сүөһүнү иитэр комплексы таһынан, сэлиэнньэҕэ 9 саҥа хотон тутулунна. Ону таһынан Саха сирин Аҕа баһылыга Айсен Николаев сорудаҕынан, Бырабыыталыстыба саппаас пуондатыттан хаһаайыстыбаларга тахсыбыт хоромньуну уу харчынан төлөөтүлэр, сэлиэнньэ олохтоохторо төлөбүрдэрин атырдьах ыйын 30 күнүгэр диэри ылбыттара.

Бу күннэргэ СӨ Тыа хаһаайыстыбатын министиэристибэтэ уокка былдьаммыт сүөһүлэр оннугар өрөспүүбүлүкэ бастыҥ тэрилтэлэриттэн 10 ньирэйи уонна 20 кууруссаны аҕалан туттарбыта. Оттон билигин, биэдэмистибэ сүөһү аһылыгын аҕалыыга үлэни ыыта сылдьар.

«Саха сирэ» хаһыат, edersaas.ru

Хаартыска sakha.gov.ru

1
0