Горнай улууһун Бэс Күөлүгэр бааһынай хаһаайыстыбалаах Алексей Петров 100 миэстэлээх арочнай хотоно ойуур баһаарыттан эмиэ эмсэҕэлээбитэ. Ол оннугар саҥаны тутуу саҥа дьиэлэри кытта тэҥҥэ саҕаламмыта.
10-ча күн анараа өттүгэр тимир-акылаатын оҥорон бүтэрбиттэр этэ. Бетонун кутан, тутуу матырыйаалын аҕалан, эркиннэрин туруортаары сылдьаллара. Хотону «Хаҥалас тутуу» ХЭУо тутар. Тэрилтэ дириэктэрэ Кан Терешкин: «Үмүрүтэрбит чугаһаата, бу күннэргэ гааһа холбонуоҕа. Билигин бу ынахтары ыырга аналлаах систиэмэни тардан бүтэрэн эрэбит. Хотон аныгы ирдэбилгэ барытыгар толору эппиэттиир. Механизированнай дэниллэр, сүөһүлэр ноһуомнарын анал механизм таһырдьа таһаарар. Хотону кытта сэргэстэһэ үүт блога диэни туттубут. Манна үүтү сөрүүкэтэр оборудованиетыгар тиийэ таҥан туруордубут. Сүөһү көрөөччүлэргэ анаан куукунатыттан саҕалаан суунар душевойугар тиийэ барыта бэлэм буолар. Эбийиэк гааһын холбооһунун кытта сыаната 45 мөлүйүөн солкуобайдаах. Билиҥҥи туругунан, хотону оҥорууга 14 киһи үлэлиир», — диэн иһитиннэрдэ.