Доруобуйа

«Бэс чагда» санаторийга ковидтаабыт дьон доруобуйаларын бөҕөргөтүөхтэрэ

Бу күннэргэ “Бэс Чагда” санаторий   мэдиссиинэ саҥа  өҥөлөрүн оҥорор кыахтанна. Ону таһынан, санаторий ковидтан реабилитациялааһын үлэтин ыытарга көҥүлү ылла. Мантан ыла бу тэрилтэҕэ офтальмология, андрология, урология, онкология, дерматология уонна да атын мэдиссиинэ салааларынан ыарыһахтары эмтиир буолуохтара.

Ил Дархан Айсен Николаев сорудаҕынан, санаторий биир сүрүн суолталаах хайысхатынан ковидынан ыалдьа сылдьыбыт дьону ыарыы содулуттан сөргүтүү, эмтээһин буолуохтаах.

Билигин “Бэс Чагда” Москва уобалаһыгар доруобуйа харыстабылын министиэристибэтигэр мэдиссиинэ үгүс өҥөтүн оҥорорго лицензияны тутууга тургутуу бастакы түһүмэҕин ааста.

— Биһиги билигин үрдүк квалификациялаах исписэлиистэри наймылаһыынан, мэдиссиинэ өҥөлөрүн саҥа көрүҥнэрин үлэҕэ киллэриигэ уонна саҥа диагностическай уонна эмтиир оборудованиены атыылаһыыга үлэни ыытан саҕалаатыбыт. Лицензиялааһын иккис түһүмэҕэ 2022 сыл 2 кыбаарталыгар былааннанар. Ону ааһарга эбии  мэдиссиинэ аныгы тэриллэрин ылыы боппуруостарын быһаарыахтаахпыт. Саҥа арыллар салаалар: эндоскопия, колопроктология уонна мэдиссиинэ реабилитациятын салааларыгар аналлаах эмтиир оборудованиены атыылаһар былааннаахпыт” — диир санаторий генеральнай дириэктэрэ Георгий Трофимов.

 

«Саха сирэ» хаһыат, edersaas.ru

Хаартыска sakha.gov.ru

0
0
Telegram @edersaas20