Уус Алдан улууһун Бэрт Ууһун нэһилиэгэр сорсуннаах булчут, нэһилиэккэ ытыы спордун бастакынан тэрийбит Валерий Романович Олесов — Охотовед Валерка үтүө аатын үйэтитиигэ аналлаах спортинг күрэхтэһиитэ сүрдээх тэрээһиннээхтик уонна сытыытык барда.
Күөн күрэс түһүлгэтигэр өрөспүүбүлүкэ араас муннуктарыттан кэлэн бэйэлэрин тургутан көрдүлэр. Ол курдук, Дьокуускайтан, Намтан, Томпоттон, Чурапчыттан, Дьааҥыттан, Орто Халыматтан, Уус Алдантан барыта 64 бэргэн ытааччы кыттыыны ылла. Убайбыт, бырааппыт, доҕорбут, дойдулаахпыт барахсан бэйэтин курдук сааһыт, булчут, кыраҕы харахтаах бэргэн ытааччы, айылҕа бастыҥ чулуу оҕотун булаары, силлиэнэн сиппийдэ, хаарынан тамнаата, буурҕанан булкуйда. Дьэ, ону тулуйбут ураанхай уот харахтанна, кыайыы көтөллөннө. Тыаллаах күнү аахсыбакка, көрдөрүү олох үчүгэй буолан барыбытын үөртэ, сүргэбит көтөҕүлүннэ.
Бэтэрээннэргэ (булчут) Бэрт Ууһун нэһилиэгиттэн Павел Васильев кыайыы өрөгөйүн биллэ. Киниэхэ дохсун ытыс тыаһыгар доҕуһуоллатан Валерий Олесов оскуолаҕа биир кылааска үөрэммит оҕолорун ааттарыттан бириис туттарылынна. Анатолий Скороходкин 2 миэстэҕэ тахсан, Валерий Олесов кырдьаҕас саҥаһа Евдокия Захарова дьиэ кэргэнин бирииһинэн, үһүс миэстэни ылбыт Павел Сыромятников — Варвара Окоемова дьиэ кэргэнин бирииһинэн, төрдүс миэстэлээх Николай Окоемов — Ыаҕайалаах дурда уолаттарын, бэһис миэстэлээх Семен Заболоцкай булт уопсастыбатын бириистэринэн наҕараадаланнылар. «С» категорияҕа, бэтэрээн Николай Додохов кыайыылаах таҕыста — Владислав Олесов дьиэ кэргэнин бирииһинэн наҕараадаланна. Николай Бурцев (2 миэстэ) — Леонид, Клара Хоруновтар дьиэ кэргэн, Петр Протопопов (3 миэстэ) — Александр Хорунов дьиэ кэргэнин, Василий Решетников (4 миэстэ) — Василий Местников, Василий Карбаканов (5 миэстэ) булт уопсастыбата туруорбут бириистэрин туттулар. Салгыы «Н» (булчут) категорияҕа Бэрт Ууһун нэһилиэгин бэргэн ытааччыта Василий Явловскай кыайыы өрөгөйүн биллэ. Боҕотумалар дурда уолаттарын (бииргэ бултуур уолаттар) бирииһинэн наҕараадаланна. Эдуард Петров (2 миэстэ) — Юрий Олесов табаарыстарын, Гаврил Рожин (3 миэстэ) — Уус Алдан улууһун тыа хаһааайыстыбатын управлениетын, Василий Петров (4 миэстэ) — Семен Охлопков, Егор Попов (5 миэстэ) — булт уопсастыбатын бириистэрин тутан үөрүү-көтүү буолла. Оттон «С» категорияҕа Бэрт Ууһун нэһилиэгин бэргэн ытааччылара Николай Черкашин 1 миэстэни ылан дьонун-сэргэтин улаханнык үөртэ. Валерий Олесов бииргэ төрөөбүттэрин аатыттан бириистэрин тутарын сэргэ, 50 сыал ытары барытын табан, күрэхтэһии «Бастыҥ ытааччыта» диэн анал аат кыайыылааҕынан тахсан «Дьүкээбил» түөлбэ анал бирииһинэн наҕараадаланна. Кинини тилэх үктэһэн иккис бириистээх миэстэҕэ Олег Черкашин таҕыста, Валерий Олесов бииргэ үөрэммит однокурсниктарын бирииһинэн наҕараадаланна. Үһүс бириистээх миэстэҕэ тиксибит Артур Бурцев нэһилиэк волейболистарын аатыттан бириис тутта. Оттон төрдүс миэстэлээх Руслан Ушницкай — Саргылана, Айта, Айтал Ховровтар туруорбут бириистэринэн, 5 миэстэлээх Иннокентий Барашков — Владимир Ноговицын дьиэ кэргэнин бирииһинэн наҕараадаланнылар.
Күөн күрэскэ өссө биир үөрүүлээҕэ, эдэр ыччат турунан, сорунан кыттыыта буолла. Болҕомтону да тарта, ааттаах-суоллаах, кыраҕы харахтаах, улахан үөрүйэхтээх булчуттары да, спортсменнары да кэнчээри ыччат кыттыыта астыннарда, сүргэлэрин көтөхтө. Ол курдук, саамай эдэр кыттааччыт Баир Бояров ытыы успуордун пропагандиһа, удьуор уус Герман Бурцевтан анал бириис тутан үөрүү бөҕө буолла. Өссө күрэс кыттыылаахтарыгар соһуччу бириис кэлэн сэргэхсийии буолла, Дьокуускай куораттан Кирилл Местниковка Олег Черкашин туруорбут бирииһэ туттарылынна. Күөн күрэс муҥутуур кыайыылааҕынан Николай Додохов буолары ситистэ. Кини Валерий Олесов дьиэ кэргэнин бирииһинэн (мангал) уонна кубогынан наҕараадаланна.
Күрэхтэһиини тэрийэн ыытыыга күүс-көмө буолбут Лидия Лебедеваҕа, Тамара Березкинаҕа, Герман Бурцевка, Николай Ивановка, Гаврил Олесовка олохтоох дьаһалта бириистэрин баһылык Юрий Николаевич туттарда. Бу курдук байанайдаах булчут Валерий Олесов — Охотовед Валерка кэриэһигэр ыытыллыбыт спортинг күөн күрэһин тэрийбит Валерий Олесов кэргэнигэр Варвара Васильевнаҕа, оҕолоругар Ленаҕа, Юраҕа, күтүөтүгэр Егорга, бииргэ төрөөбүттэригэр, бука бары аймахтарыгар, доҕотторугар Бэрт Ууһун нэһилиэгэр биир умнуллубат тэрээһин ыытыллыбытыгар, дьону-сэргэни сомоҕолообутугар махтанабыт.
Күрэс түһүлгэтиттэн бэргэн ытааччылар үүнэн-сайдан тахсалларыгар, эрбии тииһин курдук эгил-тэгил киирсииттэн уһуйуллан, кынаттанан өссө үрдүк чыпчааллары дабайалларыгар, дьону түмэр, сэргэхсийиини таһаарар, болҕомтону тардар күөн күрэһи тэрийэн ыытыга тус кылааккытын киллэрбиккитигэр сүгүрэйбит, махтал-баһыыба тылларын тиэрдэбит.
Олег Черкашин, Бэрт Ууһа, Уус Алдан.
Хаартыскаларга Василий Решетников түһэриилэрэ.