От ыйын бүтүүтэ Берлиҥҥэ Хомус аан дойдутааҕы IX кэнгириэс-бэстибээлэ буолан ааста. Уопсайа, 24 дойдуттан хомусчуттар, чинчийээччилэр кыттыыны ыллылар.
Тэрээһиҥҥэ Арассыыйаттан, Японияттан, Австрияттан, Словакияттан, Англияттан, Францияттан, Италияттан, Финляндияттан, Германияттан, Эстонияттан, Латвияттан, Норвегияттан, Венгрияттан, Кыргызстантан, Монголияттан, Украинаттан, Чехияттан, Индияттан, Америкаттан, Нидерландыттан, Литваттан, Голландияттан, Канадаттан кытыннылар.
Саха сириттэн Спиридон Шишигин, Эркин Алексеев, Туяра Жиркова, Мария Шишигина бааллар. Кэнгириэс-бэстибээли саха хомусчуттара оһуохайынан арыйбыттара уонна эмиэ оһуохайынан түмүктэннэ. Кэнгириэс иитинэн Хомус аан дойдутааҕы түмэлин уонна киинин исписэлиистэрэ Эркин Алексеев, Туяра Жиркова баҕалаах дьоҥҥо маастар-кылаас биэрбиттэр. Ити күн Испирдиэн Шишигин сольнай кэнсиэрэ буолбут. Ону таһынан, бэстибээл түмүктэниитигэр Саха сирин аатыттан кыттыбыт түөрт бэрэстэбиитэл кэнсиэр туруорбуттар.
Кэмпириэнсийэ тэйиччиттэн көрүҥүнэн ыытыллыбыт буолан элбэх киһини хапта. Саха сириттэн Хомус аан дойдутааҕы түмэлин уонна киинин бэрэсидьиэнэ И.Е.Алексеев-Хомус Уйбаан, дириэктэр Д.Д.Бястинов, Арассыыйатааҕы Тимир уустарын Сойууһун вице-бэрэсидьиэнэ, СӨ Тимир уустарын ассоциациятын бэрэсидьиэнэ, норуот маастара Н.Н.Бурцев киэҥ кэпсэтиигэ кытыннылар.