Маны аах Уопсастыба

«Беркут» Арассыыйаҕа уон бастыҥҥа киирдэ

«Беркут» хамаанда «Победа» Арассыыйатааҕы байыаннай-спортивнай оонньууга кыттан уон бастыҥ иһигэр киирдэ.
Чурапчы улууһуттан «Беркут» үөрэнээччилэр хамаандалара «Победа» диэн Арассыыйатааҕы байыаннай-спортивнай оонньууга ситиһиилээхтик кытыннылар. Күөн күрэскэ 71 хамаанда кыттыбытыттан, оҕолор уон бастыҥ иһигэр киирэри ситистилэр. Бу туһунан улуус дьаһалтатын пресс-киинэ СИА иһитиннэрдэ.
«Победа» байыаннай-спортивнай оонньуу Арассыыйаҕа ыытыллыбыта 20-тэн тахса сыл буолла. Түмүк балаҕан ыйын 29 күнүттэн алтынньы 3 күнүгэр диэри «Патриот» пааркаҕа уонна Москва уобалаһын «Алабино» байыаннай полигонугар ыытыллыбыт. Оонньууну «Юнармия» РФ Оборонаҕа, РФ Үөрэххэ министиэристибэлэрин уонна оскуола үөрэнээччилэрин Арассыыйатааҕы хамсааһынын кытары тэрийбиттэр.

Санатан эттэххэ, Саха сиригэр быйыл саас 12-17 саастаах оҕолор кыттыылаах өрөспүүбүлүкэтээҕи  XXII байыаннай-спортивнай оонньуулар түмүктэрэ тахсыбыта. Күрэхтэһии өрөспүүбүлүкэтээҕи түһүмэҕэр Калашников аптамаатын  хомуйуу, бэрийии, аптамаат маҕаһыыныгар ботуруоннары угуу, стройдаан хаамыы, уопсай физическэй бэлэми көрүү күөн күрэһэ ыытыллыбыта. Онно Чурапчы улууһун хамаандата кыайыылааҕынан тахсан, «Победа» Арассыыйатааҕы байыаннай-спортивнай оонньууга Саха сирин аатыттан кыттар үрдүк чиэһи сүкпүтэ.

0
0