Балаҕан ыйын 8—15 күннэригэр Калининград куоракка буолбут оҕунан ытыыга Арассыыйаҕа бастыыр иһин күрэхтэһиигэ 35 регионтан 400-тэн тахса охчут кытынна.
Блочнай оххо хамаанданан күрэскэ Чурапчытааҕы спорт киинин иитиллээччилэрэ Михаил Филатов, Асим Павлов уонна Семен Захаров кими да иннилэригэр түһэрбэтилэр.
Төһө да халлаан ардаан, тыалыран көрүстэр, финалга тахсар иһин күрэскэ саха уолаттара Забайкалье охчуттарын 223:219 ахсаанынан хоппуттара. Оттон кыайыылааҕы быһаарар күөн көрсүһүүгэ Москва сүүмэрдэммит хамаандатыттан икки очукуонан чорбойон таҕыстылар.
Былырыын бу састаабынан уолаттар Белоруссияҕа ыытыллыбыт норуоттар икки ардыларынааҕы турнирга боруонса мэтээли ылбыттар. Оттон Михаил Филатов, Асим Павлов, Павел Мартынов буоланнар, иккитэ Арассыыйа Кубогын хаһаайыннарынан буолбуттара. Олорго кыайыылааҕы быһаарар түмүк ытыыга эмиэ Забайкалье уонна Москва хамаандаларын баһыйан тураллар.
Роман Попов, «Саха сирэ» хаһыат