Бэргэн ытааччылар Арассыыйа чөмпүйэнээтигэр ситиһиилээхтик кытыннылар

Күрэхтэһии «Демидовскай» спортинг-кииҥҥэ от ыйын 24-26 күннэригэр ыытылынна диэн СИА Спорт Якутии сигэнэн суруйар. Түмүккэ Саха сирин спортсменнарын хамаандата Нижнэй Тагилтан кыайыы-хотуу көтөллөнөн, икки кыһыл көмүс, биир боруонса, икки үрүҥ көмүс мэтээллээх кэлбит.

Юниордарга РФ спорт маастара, 15 саастаах спортсмен Рамир Николаев бастакы миэстэҕэ тахсары ситиспит. «А» категорияҕа үс бастакы миэстэҕэ киирсэр иһин Саха сириттэн спорт маастардара Степан Чепалов, Игорь Егоров, Артур Николаев күрэхтэспиттэр. Үс күннээх күрэстэһии түмүгүнэн боруонса мэтээли Артур Николаев ылбыт. Игорь Егоров уонна Степан Чепалов 7-10 миэстэлэргэ тахсыбыттар. «В» категорияҕа Альберт Кузьмин үрүҥ көмүһү ылары ситиспит. Бу категорияҕак 4-5 миэстэлэри Евгений Иванов уонна Иван Ли-Фу-Сай (Орто Халыма) ылбыттар. «С» категорияҕа Андрей Кузьмин ситиһиилээхтик кыттыбыт. Оттон спортинг супер-бэтэрээннэригэр Василий Алексеев бастаабыт.

Түмүккэ Саха сирин бэргэн ытааччылара «Демидовскай» былаһаакка хамаандатын тилэх үктэһэн, үрүҥ көмүс наҕарааданы ылары ситиспиттэр.